Ndwen 5 ngoenz 3, Swcigih Minzyijveij aen ban son’gyauq Saw- cuengh daengx gih minzyij hidungj ganbu bi 2018 haiban denjlij youq Guengjsae Sawcuengh Hagdangz banh. Swcigih Minzyijveij fucujyin Veih Yungjhungz、Yi Siz, Swcigih Minzyijveij Minzcuz Yijvwnz Fanh- yizcu、Guengjsae Sawcuengh Hag- dangz mizgven bouxfucwz caeuq bouxhag、lauxsae gungh 20 lai boux camgya denjlij.

Haiban denjlij le, Veih Yungj- hungz vih gyoengq bouxhag hwnj- dangz. De hwnjdangz seiz gaenjndaet giethab daengx gih minzyij hidungj guh son’gyauq Sawcuengh gig miz yiyi youqgaenj, lwnh le gij gihbwnj cingzgvang hong saw vah minzcuz gih raeuz hawj gyoengq bouxhag, ceijok le gij yenzcwz hong saw vah minzcuz wnggai ciuqei haenx, caemhcaiq lwnhgangj le gij dazyinx ngeixnaemj、cujyau moegbiu caeuq yinvu hong saw vah minzcuz guek raeuz seizneix caeuq coglaeng duenh seiz ndeu, lwnhgangj le gij cujyau yinvu hong Sawcuengh Vahcuengh Swcigih Cwngfuj dinghcinj caeuq gij cwngcwz fapgvi fuengmienh hong saw vah minzcuz, faensik le hong saw vah minzcuz seizneix bungz daengz hwngfat seizheiq caeuq hojnanz daengj, hawj gyoengq bouxhag ndaej ik lai.

Ciuq cam rox, Swcigih Minz- yijveij banh baez ban son’gyauq neix dwg vih gyagiengz hwnjguh aen doih vunzcaiz song saw vah, doidoengh hong gungganq ganbu song saw vah, seiz son’gyauq daj ndwen 5 ngoenz 3 daengz ndwen 6 ngoenz 29. Bouxhag camgya son’gyauq cujyau dwg daengx gih minzyij hidungj lingjdauj ganbu、cizsuz danhvei caeuq boux ciennieb bwhlaeng rombwh aen bouhmonz guhhong vah minzcuz gihcwngz daengj. Doiq gij cingzgvang dingzlai bouxhag giekdaej Sawcuengh Vah- cuengh haemq ca, son’gyauq gocwngz neiyungz laeb miz vahyaem Saw- cuengh Vahcuengh、yijfaz、sawloih daengj giekdaej cihsiz, goengcieng、baiz、hoihbiu daengj fanhoiz giekdaej cihsiz, gij lijlun cwngcwz saw vah minzcuz, gij vwnzva conzdungj maenhndei minzcuz vunznoix、cekgej yisuz daengj, hawj son’gyauq engq miz cimdoiqsingq caeuq saedyauq- singq.(Veiz Cauh Vangz Hauyinz)