bouxraiz Swng’aihgwzsuhbeilij bouxhoiz Luz Fwncangz

Caeklaiq, vihliux aen mingzdaeuz hingzsingh iq B612, boux guekvuengz Dujwjgiz fatlingh gaemh vunzlai daenj buhvaq Ouhcouh, bouxlawz mbouj daenj cix gaj dai bae. Daengz bi 1920, boux canghdienfaenz neix daenj dauq buhvaq Ouhcouh gyaeundei he, baezmoq daezok gij lwnhcingq de, baezneix vunzlai cungj saenq de liux lo.

Gou lwnh gij siujsaeh hingzsingh iq B612 neix hawj gyoengqsou nyi, lij raiz gij hauhsoq de okdaeuj dem, dwg vihliux gvenq gyoengq bouxlaux, aenvih doenghgij bouxlaux neix gyaez soq. Danghnaeuz mwngz lwnh gyoengqde mwngz gap ndaej boux baengzyoux moq ndeu, gyoengqde mbouj ngah cam mwngz: “Sing de baenz yienghlawz ne? De gyaez caemz gijmaz ne? De comz biubonj duzmbaj lwi?” Gyoengqde gyaez cam mwngz: “De geijlai bi ha? De miz geij beixnuengx ha? De naek geijlai gaen ha? Boh de ra ndaej geijlai ngaenz ne?” Gyoengqde laihnaeuz cam rox gijneix cij suenq rox boux baengzyoux neix.

Danghnaeuz mwngz doiq boux- laux naeuz:“Gou yawjraen aen ranz gyaeundei ndeu aeu cien ndinggyaemq caep baenz, gwnz cueng miz go- ndokdom, dingjranz miz roegguxgap douh……” Gyoengq bouxlaux naemj mbouj ok gij yiengh aenranz neix miz geijlai ndei. Hoeng, danghnaeuz mwngz doiq gyoengqde naeuz: “Gou yawjraen aen ranz ndeu dij cib fanh maenz ngaenz Fapguek.” Gyoengqde cix doeksaet naeuz:“Aenranz de geij- lai gyaeundei ha!”

Danghnaeuz mwngz doiq gyoengqde naeuz:“Miz dahraix, de gig mbauqndei, de riu- nyumnyum, siengj aeu duz yiengz ndeu. De siengj aeu duz yiengz iq ndeu, neix couhdwg gij baengzgawq miz Lwgvuengziq dahraix.” Gyoengq- de itdingh yungyung aenmbaq, dangq mwngz guh boux lwgnyez ndeu ndwi. Hoeng, danghnaeuz mwngz yienghneix doiq de gangj:“De dwg daj hingzsingh iq B612 daeuj.” Yienghneix gyoengq- de couh saenq mwngz lo, caemhcaiq mbouj cam sam cam seiq, mbouj cam gwnz cam laj dem lo. Gyoengq bouxlaux couh gyaez yienghneix lo. Gyoengq lwgnyez raeuz wnggai doiq gyoengq bouxlaux dungxgvangq di bw, gaej ienq gyoengqde lai.

Dangyienz, doiq gyoengqraeuz rox gvaq ndwenngoenz daeuj gangj, raeuz cix mbouj dawz doenghgij soqhauq neix cuengq haeuj ndawsim ne. Gou caen nyienh lumj gangj cienzgangj yienghneix daeuj hainduj gangj aen gojgaeq neix, gou caen siengj yienghneix gangj:

“Gaxgonq, miz boux Lwg- vuengziq ndeu, de youq gwnz aen singhgiuz iq ndeu youq, aen singhgiuz iq neix hung mbouj gvaq de geijlai, de muengh miz boux baengzyoux ndeu……” Doiq gij vunz rox gvaq ndwenngoenz haenx daeuj gangj, yienghneix gangj lai caensaed di.

Gou mbouj gyaez bouxwnq seizbienh doeg saw gou, aenvih gou raiz gij saeh gaxgonq neix ndawsim gig nanzgvaq. Boux baengzyoux gou daiq duzyiengz de byag gou bae ndaej roek bi lo. Gou youq gizneix caenhrengz bae raiz de, couh dwg vihliux mbouj lumz de. Lumz baengzyoux sawj vunz daiq siengsim lo. Mbouj dwg bouxboux vunz cungj miz gvaq boux baengzyoux ndeu. Danghnaeuz gou lumz de bae, gou aiq goj bienq lumj bouxlaux yienghde, cij doiq gij soq mizyinx, mbouj gyaez gijwnq saek di lo……

Aenvih gou mbouj siengj lumz de bae, yienghneix gou couh bae cawx ndaej hab liuhsaek ndeu caeuq geij gonj yienzbit. Geq lumj gou yienghneix, caemhcaiq cawzok roek bi seizde veh gvaq baihndaw roxnaeuz baihrog duznuem ndwi, gou mbouj veh gvaq gijwnq gvaq, seizneix dauqcungz gaem bit guh veh, caen dwgrengz lai lo. Dangyienz gou itdingh caenhrengz veh de lumj liuxliux bae, hoeng veh baenz mbouj baenz gou caemh mbouj rox bw. Mbangj veh ndaej ndei, mbangj cix yaez. Ndang hung iq goj veh mbouj cinj geijlai, mbangj veh sang di, mbangj cix veh daemq di. Veh saek buhvaq de goj dwgrengz lai, mbouj rox veh deng roxnaeuz mbouj deng. Yienghneix, gou couh sawq yienghneix sawq yienghde, mbangj ndei mbangj yaez, muengh gaej caeuq de doxca lai. Danghnaeuz gou veh mbouj ndei, vunzlai goj gaej gvaiq gou lai bw. Aenvih boux baengzyoux neix, mbouj ciengz gejnaeuz gijneix gijde hawj gou gvaq. De aiq laihnaeuz gou caeuq de doxlumj, caemh goek caemh rag. Hoeng gou caeuq de mbouj doxlumj ne, gou yawj mbouj byoengq duzyiengz ndaw hab. Gou daihgaiq miz di caeuq gyoengq bouxlaux ca mbouj geijlai. Gou itdingh dwg bienq geq lo.(5)