Dajswh vuengzdaeq baezgonq deng yaeuh le, de couh bienqbaenz siujsim riri, gizgiz daezfuengz bouxyaeuh, hojsik ngoenzndei mbouj nanz, baez neix, de youh deng yaeuh lo.

Vuengzdaeq youq rog singzbauj youzbyaij seiz yawjraen mbaw ciubinq gvangjgau ndeu, gwnzde sij naeuz:“Swngdancez Gunghswh yaek ciuyungh bouxgaemsoq song bak boux, bi cienzhong cib fanh maenz! Lienzhaeh dienhvah: 8524454; conzcinh: 8544247; QQ: 512431564; youzsieng: sdj@126.com.” Vuengzdaeq raemh doeg sam baez, angq- vauvau ngeix: Va! Cienzhong caen sang ho! Danghnaeuz gou baij boux vunz ndeu bae guhhong, haenx gou bi ndeu couh canh ndaej haj fanh maenz! Danghnaeuz caiq lai baij di vunz, yienghhaenx couh ndaej…… De deq mbouj gib mbon aen soujgih okdaeuj, bued doeng dienhvah: “Vei, cingj cam dwg Swngdancez Gunghswh lwi?” “Dwg ha.” Ndaw dienhvah cienz daeuj gij sing boux vunzsai cungnienz ndeu, “Mwngz dwg siengj wngqbinq bouxgaemsoq ha?” “W, dengdeng!” Vuengzdaeq gipmuengz han de,“Gou gizneix cingqngamj miz song bak boux yenzgungh rox gaemsoq. Dou seizlawz ndaej bae mienhsawq?” Bouxsai cungnienz simdingh cubcub han naeuz:“Ngoenzcog, youq ndaw aen veiyisiz Baujlungz Daciujden.”

Vuengzdaeq angqvauvau han naeuz:“Yiengh- haenx, dou ngoenzcog couh daeuj mienhsawq!” “Gaej gip bw! Sou sien gyau song cien maenz cienzbuh, gij buhvaq dou gaugaep raixcaix! Mbouj miz buhvaq mbouj nyinh vunz! Couh yungh ngaenzhangzgaj geiq cienz daeuj hawj gou ba. Itgungh dwg seiqcib fanh maenz.” Mbouj siengj daengz, ndaek vuengzdaeq damcaiz neix lij caengz yawj ok gij hongx de ne! De sangjbak couh dapwngq lo.

Ngoenz daihngeih, vuengzdaeq raen yiengh- yiengh cungj anbaiz dojdangq lo, angqfwngfwng hawj mbiengjde dwk dienhvah. Hoeng de baenzlawz siengj ndaej daengz, ndaw dienhvah cienz gij sing daeuj dwg yienghneix: “Gij haumaj mwngz bueddwk haenx dwg hauhhoengq!” De deng hwk dwk doek- saetyat, ganjgaenj yungh QQ haumaj caeuq cenzcinh lienzhaeh baez ndeu, hoeng baelawz lij miz vunz han dem! Seizneix de cij roxdaengz swhgeij con haeuj aenhongx vunz bae lo.

Aen gojgaeq neix lwnh raeuz nyi, gaej dam caiz lai bw.

(bouxsij Cai Veiminj bouxhoiz Goenggen)