Rog cueng fwn doek daengx hwnz, baihrog cij ndaej nyi sing fwn doek daeuj gwnz namh “dikdaek dikdaek”, hawj vunz gyanghwnz ninz mbouj ndaek.

Geiq ndaej seiziq, hix ciengz youq bakcueng roxnaeuz lajroq yawj fwn, yawj gyoengq bo baq deng fwn soen、deng fwjmok heux, caeuq doengzdoih naengh youq lajroq eu fwen rwenz.

Youq giz dou, miz gij angq gag duh aen seizciet he. Ndwencieng dou gaj mou gaj gaeq, caemh gwn caemh angq. Lwgnyez bae ranz daiq aeu gagaeq、aeu faengx hung caeuq aeu cienz cieng, ndaej daenj buh moq vaq moq, mehmbwk lij ndaej daenj haizva meh saek moq. Mbwn laep couh doxiu dawz dendungz okrog youz, mbauqsau baenz gyoengq, okbae daengz gyanghwnz lij mbouj nyienh dauq, bae daengz gwn haeuxcaeuz mbouj vangq. Meh naeuz, seiz de lij coz, ndwencieng coit daengz cibhaj, mbauqsau gyae’gyawj cungj daeuj bakdah doiq fwen, ciengq ndaej bwtdaep fouz. Byawz mbouj rox eu fwen caeuq bouxlaux naengh youq henz feiz cungj deng gyoengqvunz riu. Daengz sam nyied sam, aenvih aen mbanj ngoenz guhhoh mbouj dox- doengz, ndigah dou ngoenz he youq mbanj neix caemz, ngoenz he youq mbanj de youz. Dou gwn haeuxnaengj haj saek, caemz gyaeqnding, mbouj ngah gijgwn ngah gij angq gij faengz doxcomz. Bouxlaux naeuz, gvaq sam nyied sam yaek aeu nengz naz caeuq bya dah bae caeq cojcoeng, baenzneix dahsau couh doxiu roengz dah bae dwk nengz, daegmbauq couh roengz dah bae dwk bya.

Seizhah, gyoengqdou doxcomz guhdoih bae ndaw dah youzraemx, daj baihgwnz youz daengz baihlaj, daj haenzneix youz daengz haenzde. Seizde lij iq mbouj rox bo sang raemx laeg, mbouj nyi bouxlaux gangj youzraemx aeu haeujsim, gou yaek daidah sam baez. Banhaemh, daeng- ngoenz yaek doek congh, dahsau dawz aenroengz roengz dah ra lwgsae, daegmbauq naengh youq henz dah ep bya roxnaeuz vad ruz dwkmuengx. Youq laj fwjhaemh hoengzfwg, dou youq gwnz raiq buet bae buet dauq, sing riu hongz cienz gizgyae bae. Gwn caeuz gvaq, swiq lwgsae saw cuengq cauq rung, rung cug dawz bae gyang canz dit noh lwgsae okdaeuj gwn, ranznden hix daeuj caemh dit caemh gwn. Gwnz mbwn ronghndwen haufaufau, youq gyang canz, bouxlaux gangj gojgaeq ciuhgonq hawj dou, dou dingq ndaej song da dinghdingh.

Daengz seizcou，ngamq gwn ngaiz gvaq couh gwed ruh bae fad haeux. Maij sing fad haeux “bumjbingj bumjbingj”, maij num gij hom fiengz ngamq gvej, maij youq gyang doenghnaz gyaep duzdaek, maij youq gwnz fiengz guhcaemz, maij gij angq ndaej demsou. Hwnj bo bae sou makyouz, lumj duzlingz bin hwnj bin roengz, deng sieng in hix mbouj daej mbouj heuh.

Seizdoeng gengxnit, dou doxiu dawz batfeiz bae hagdangz, cuengq batfeiz youq laj daizsaw, caez byoq caez raeuj. Seizde lauxsae insik dou, lau dou nit, baez caengz daengz mbwn nit couh cuengqgyaj hawj dou bae bo aeu fwnz, daengz nit couh hawj dou coemh, gyoengqdou humx dongfeiz, byoq daengz naj nding rwz ndat cij nyienh bae hwnjdangz. Aeu gij haeuxdaeq laux cauj coq daeh, seiz mbouj seiz mbon song naed okdaeuj gwn hix roxnyinh rang dangqmaz.

Seizneix, miz soujgih miz densi lo, dou ndaej seizseiz caemz soujgih yawj densi, mbouj lumj seiziq gyaez okrog bae youz, hix mbouj maij caeuq vunz doiqnaj gangjgangj riuriu.

Ndwenngoenz lumj dah lae, rox bae mbouj rox dauq. Hix byaij gvaq haujlai roen, bungz gvaq haujlai vunz, yawj gvaq haujlai funghgingj, hoeng cix baenzlawz hix ra mbouj raen gij roxnyinh seizhaenx lo.