Ndwen 4 ngoenz 18 banhaet, ciet lijyouz vwnzva Loegvet caeuq haw- fwen “sam nyied sam Bouxcuengh” Cungguek Mbanjcuengh·Vujmingz bi 2018 youq Namzningz Si Vujmingz Gih Dijyuzgvanj banh aen yizsi haimuq. Mwh aen yizsi haimuq, canghfwen Mbanjcuengh cuengq sing eu fwen, bouxyienj diuqfoux caenhsim diuqfoux, daengx aen hozdung yienh- ciengz miz gij minzcuz fungcingz Bouxcuengh naekgywggywg hawj vunz maez.

Ngoenzhaenx aen yizsi haimuq youz gofoux 《Mehlungz Yienh Fuk》 haiciengz, gij biujyienj hingzsik gig miz minzcuz fungcingz Bouxcuengh, hawj bouxyawj yawj dwk lwgda cungj mbouj yaep. Daizvanh Ahmeijcuz gofoux biujyienj 《Ahmeijcuz Caeq Fungnienz》 youz Daizvanh Vahlenz Yen Vayinz Cunghyoz canhfangjdonz daiq daeuj haenx, biujyienj hingzsik moqsag daegbied, hawj gij heiqfaenh hozdung engq nauhyied.

“Sam cien” hanghmoeg liglaiz dwg aen hozdung hawfwen hozdung neiyungz ndawde ceiq hawj vunz cimyawj he. Aen yizsi haimuq le, cien vunz diuq fouxsaux、cien vunz fouxswt、cien vunz diuqfoux eu fwen foenfoen yienj, ca mbouj geijlai cien boux bouxyienj faenbied gapbaenz “doih haizgieg”“doih diuqfoux Bouxcuengh”“doih fouxgoepgvej” daengj aendoih caez biujyienj, gangj- ok gij cawjdaez “eu fwen diuqfoux·Vujmingz goksad”.

Haimuqsik sat le, bouxyawj bae daengz aen gvangjcangz baihlaeng Vujmingz Gih Dijyuzgvanj, camgya “gij cingz Loegvet, diuzlinx ndaej- geiq” Ranzcuengh naengj haeux- naengj haj saek hozdung. Ciuq cam rox, vihliux hawj bouxyawj caeuq bouxhek ndaej cimz haeuxnaengj haj saek, baez neix Vujmingz Gih naengj 3389 gaen haeuxnaengj haj saek, eiqsei dwg youq gaiq diegnamh 3389 bingzfueng goengleix neix, Vujmingz gak cuz beksingq saedceij ngoenz ndei gvaq ngoenz.

(Dangz Ciuhyen)