Ngoenz haenx banhaet, dax- meh bae hawciengz cawx ma daeh doxgaiq ndeu, yienghceij aende lumj daengloengz nei, dwggyaez dangqmaz, aende wnggai couh dwg “makyungz” luba. Ngoenznaengz baez miz gijmaz ndei gwn, daxmeh cungj hawj dou cimz gonq, ngoenzneix de vihmaz mbouj guhsing couh venj aendaeh neix hwnj bangxciengz bae ne? Caen dwg yied naemj yied geizheih.

Banringz, vunz ranz gou cungj bae ninz lo, gou lij gvaqniemh daeh “makyungz” haenx, gaenbonj ninz mbouj ndaek. Gou laeglemx muengh seiqhenz, gyoengqde cingq ninz ndaej vannyum ne, yienghneix couh ngamj lo, gou sikhaek hwnqmbonq, ndonj haeuj fuengzdajcawj bae. Gij “makyungz” lij venj youq gwnz ciengz ne, gou buen daeuj aen- daengq, yienzhaeuh caij hwnjbae, iet song fwngz aeu aendaeh, daj gyang daeh mbon ok aen makyungz hung ndeu, mad haeuj najbuh bae le couh deq mbouj gib cuengq haeuj bak bae, yungh rengz haeb gaemz ndeu, hoeng cix haeb mbouj ndaej. Gou couh aeu fagcax daeuj buq, byawz siengj daengz, baez buq roengzbae le, gij raemx mak cungj sinz haeuj naj gou daeuj liux, sikhaek, da gou hai mbouj ndaej lo, aenbak hix youh maz youh manh, caen hojsouh lai lo, hoeng gou youh mbouj gamj ok sing, lau hawj daxmeh rox gou caeg gwn doxgaiq. Gou gipmuengz cuengq roengz fagcax, aeu fwngz bae nu lwgda, hoeng yied nu yied sep, raemxda conh ok mbouj dingz, gou dingj mbouj ndaej daejngaungau lo.

Gyoengqde cungj deng cauz ndiu lo, raen gij yienghceij gou cungj riu ndaej hwet gungj liux. Yienzlaiz gij “makyungz” neix dwg “lwgmanh daengloengz”. Daxmeh doq hawj gou cungswiq lwgda riengxbak, doq riu naeuz: “Neix dwg fad boux ngahgwn ha.”

Neix dwg gij saeh yinx seiziq, seizneix dauqngeix hwnjdaeuj lij nyaenx mbouj ndaej riu ne.

(bouxsij Cwng Cinhfung bouxhoiz Ouh Caijfangh)