●Geij bi neix daeuj, Baksaek Si Yougyangh Gih yungh gij banhfap cwngfuj bangbouj, doiq gij canjnieb oij hengzguh gveihmozva、gihgaiva hwnjguh, bang doi demcanj laisou. Ciuq cam rox, aen gih neix seizneix oij swnghcanj gihgaiva suijbingz daengz 52.52%. Daengz ndwen 3 ngoenz 27, 2017/2018 seiz dokoij oij haeuj cangj 51.9 fanh dun, saedyienh boux- guhnaz gai oij cungjsouhaeuj daengz 2.75 ik maenz.

(Luz Gez)

●Bineix daeuj, Lungzlinz Gak Cuz Swciyen mboujduenh vatcimh rengzndumj, genhciz baujmaenh soqliengh gyalai caetliengh engq ndei, cauhmoq banhfap、giengzvaq cwng- guenj, ceng’aeu gak hangh hong onjyamq doicaenh. Daengz ndwen 3 ngoenz 30, aen yienh neix caizcwng souhaeuj guhsat 15758 fanh maenz, doengzbeij gyalai 16.50%, guhsat 23.05% nienz- doh yawhsuenq.

(Vangz Hungznganz Luz Goh)

●Haeuj seizcin dox- daeuj, Denzlinz Yen Ding’anh Cin gaenxmaenx sonyinx vunz- lai gaemdawz seizhong, haiguh seizcin dajndaem hozdung, youq gyang reih gyang naz diegdieg raen vunzlai nyaengq- nyi’nyi. Ciuq cam rox, aen cin neix seizneix ndaem miz gak loih gomiuz daih’iek 1.9 fanh moux, ndawde lwgbieng seizcin 1012 moux, oij 1930 moux, byaek 2000 moux.

(Bangz Yungjcwngz)

●Ndwen 4 ngoenz 4(liggaeuq ndwenngeih cibgouj), dwg ciet vwnzva hawfwen conzdungj Bingzgoj Yen Gojva Cin Bohli Cunh bi gvaq baez haenx. Bingzgoj Yenveij Cwngfazveij cungfaen leih- yungh gij seizndei ciet hawfwen conzdungj vunz doxcomz lai, cujciz cwngfaz gak bouhmonz bae daengz Bohli Cunh haiguh cienzmienh ceihleix henhoh onjdingh bingzan cauhlaeb、gimqdoeg、gyaez roen hoh roen daengj senhconz hozdung.

(Veiz Caijlu)