Soengq Hawj Laizvungh·veizwjdwz

Gou muengh gyoengq lwgnyez yienzliengh gou soengq bonj saw neix hawj boux bouxlaux ndeu. Lajneix dwg leixyouz gou: Boux bouxlaux neix dwg lajmbwn neix baengzyoux ceiq ndei duh gou. Gou lij miz aen leixyouz wnq: Boux bouxlaux neix gijmaz cungj rox, gij saw raiz hawj gyoengq lwgnyez de goj rox. Gou lij miz aen leixyouz daihsam: Boux bouxlaux neix youq Fapguek, de youq baihde dungx iek lai, ndang nit lai, mbouj miz vunz nai de, de doeknaiq lai. Danghnaeuz doenghgij leixyouz neix lij caengz doh, yienghneix gou nyienh soengq bonj saw neix hawj boux bouxlaux seiziq de, bouxboux bouxlaux gaxgonq cungj dwg lwgnyez (hoeng gyoengqde mbouj miz geijlai vunz geiq ndaej). Yiengh- neix, gou cix gaij coenzsoengq baenz coenz lajneix:

Soengq hawj seiziq Laizvungh·veizwjdwz.

It

Mwh gou ndaej roek bi, youq ndaw bonj saw《Gojgaeq Caensaed》raiz ndoengfaex ciuhnduj de, yawjraen mbaw vehcap mizyinx ndeu, dwg veh duz nuem ndeu gyan duz doenghduz ndeu, couhdwg mbaw veh lajneix:

Ndaw saw raiz naeuz: “Duznuem gyan doenghduz roengz dungx mbouj nyaij, ndwnj roengz dungx liux le, duznuem cak mbouj ndaej lo, yienghneix couh ninz baenz roek ndwen hawj gij gwn neix siuvaq.”

Yawj sat, gou naemj daengz haujlai doenghduz ndaw ndoengfaex doxdwk doxgwn, yienghneix, gou couh aeu bit veh ok mbaw veh daih’it duh gou, couhdwg mbaw lajneix:

Gou dawz mbaw veh neix hawj gyoengq bouxlaux yawj, lij cam gyoengqde dwglau lwi.

Gyoengqde han gou naeuz: “Aenmauh miz gijmaz dwglau ne?”

Gou mbouj dwg veh aenmauh, dwg veh duznuem cingq siuvaq duzciengh ndeu. Vihliux hawj gyoengq bouxlaux yawj rox, gou youh veh ok gij yiengh ndaw dungx duznuem. Deng gejnaeuz hawj gyoengqde nyi gyoengqde cij rox. Mbaw veh daih- ngeih duh gou dwg mbaw lajneix:

Baezneix, gyoengq bouxlaux cungj heuh gou gaej veh mbawveh duznuem lai, mboujguenj veh baih- ndaw roxnaeuz veh baihrog, bae hag deihleix, lizsij, suenqsoq, yijfaz lij lai ndei gvaq. Yienghneix, mwh gou ndaej roek bi, gou couh mbouj muengh daengzcog guh canghveh lo. Mbawveh daih’it caeuq mbawveh daihngeih gou cungj veh mbouj baenz geijlai, gou doeknaiq dangqmaz. Gyoengq boux- laux gag yawj youh yawj mbouj rox, lij deng aeu lwgnyez gejnaeuz dem, mbwq lai lo.

Doeklaeng, gou cijndei bae guh yiengh wnq. Gou hag rox hai feihgih lo, lajmbwn gizgiz ca mbouj lai cungj mbin daengz gvaq, cingqcaen hag deihleix doiq gou miz yungh raixcaix. Gou baez yawj couh baen ndaej ok Cungguek caeuq Yalijsanghnaz. Danghnaeuz gyanghaemh byaij loek roen le, rox deihleix caen miz yungh dahraix lo.

Ciuh vunz neix, gou caeuq haujlai vunz baedauq. Gou riengz gyoengq bouxlaux caemh gwn caemh youq ndwenngoenz gig nanz, haeuj- gyawj gyoengqde caemhcaiq cazyawj gyoengqde, hoeng yawj gyoengqde lij lumj gaxgonq, mbouj miz gijmaz gaijbienq.

Gou nyangz saek boux uk singj, cungj aeu mbaw veh daih’it gou okdaeuj cam de, yawj de rox mbouj rox. Hoeng mboujguenj dwg bouxlawz, bouxsai roxnaeuz mehmbwk, cungj naeuz: “Dwg aenmauh go.” Yiengh- neix, gou couh mbouj caeuq gyoengq- de gangj duznuem ha, ndoengfaex ciuhnduj ha, caemh mbouj gangj ndaundeiq doengh gijneix. Gyoengqde rox gijmaz gou couh caeuq gyoengqde gangj gijmaz, lumjbaenz gyauzbaiz, giuzgauh’wjfuh, cwngci roxnaeuz lingjdai. Yienghneix, gyoengq boux- laux couh angqyoekyoek ndaej roxnaj gou boux vunz roxsoq roxlaex neix lo.

(1)