Aenndang sangredred, byoem- gyaeuj dinjdeded, naj riunyumnyum, de dwg bouxlawz ya? De ya, dwg boux yijvwnz lauxsae gou—Yangz lauxsae.

Yangz lauxsae moix baez daeuj hwnjdangz, cungj beq aen daehbaengz saekloeg ndeu, gwnz daeh yaenq miz aen doz yungzmauh dwggyaez ndeu. Mwngz gaej yawjsiuj aen daehbaengz gig bingzciengz neix, baihndaw coux miz haujlai “huqbauj” mwngz naemj mbouj daengz ho, miz gijyungh hagsib saengeiz, miz gijgwnz feihbak, lij miz gij vacim raek najaek, gaugien cug byoem gyaeundei de gag guh haenx. Gou heuh aen daeh hung neix guh “daehcomzbauj”, gou ciengzseiz siengj, baez neix, Yangz lauxsae youh hawj daihgya daiq daeuj gijmaz huqbauj geizheih ne?

Miz baez ndeu, aenvih Cwnz Sinhyingj sij cozyez nyinhcaen, cih sij ndaej ndei sij ndaej cingq, vihliux dajciengj de, Yangz lauxsae daj ndaw “daehcomzbauj” genjaeu aen vacim hajsaek ndeu, naeuz: “Mboengqneix, Cwnz Sinhyingj doengzhag guh ndaej gig ndei, ndigah lauxsae yaek hawj de gaiq ciengjbinj daegbied ndeu, yawj, gaiq neix dwg gou caen fwngz guh bw!” Cwnz Sinhyingj angq dwk bak mbouj rox haep, gyoengq doengzhag cungj hozhaenz byaengqda ngonz de, miz mbangj gag damzbyoedbyoed: “Gou itdingh lumj Cwnz Sinhyingj ityiengh nyinhcaen hagsib, yiengh- neix, gou hix ndaej dajciengj lo.”

Lij miz baez ndeu, Cwnz Sinhyiz dungx in, bak haemz, ngaizromh gwn mbouj roengz. Yangz lauxsae rox le, couh daj ndaw “daehcomzbauj” dawz aen baudousah okdaeuj, doiq Cwnz Sinhyiz naeuz: “Mbouj gwn ngaiz- romh, doiq ndangdaej mbouj ndei, ne, hawj mwngz, vaiq gwn aen bau neix ba!” Cwnz Sinhyiz ciep aeu aenbau, ndaek gaemz ndaek gaemz gwnz roengzbae, lumjbaenz gij bingh de ndei bae dingz ndeu lo.

Dou cungj haengjheiq “daeh- comzbauj” Yangz lauxsae, aenvih, baihndaw coux rim le gij gujli caeuq gij gyaez Yangz lauxsae hawj dou haenx.

(bouxsij Luz Cenhyij bouxhoiz Goenggen)