Daxgoeng seizdoeng gaemh diuz faexdwngx, rod hangz mumhhau de, menhnyednyed byaij lo. Dahsau seiz- cin riuj aen gyoiva, yamq din mbaeumbengmbeng, daeujdaengz laj- biengz. Fanh yiengh ndiu dauq, bak va caez langh, dauqcawq cungj dwg hoenghhwdhwd.

Mwngz yawj! Duz roegenq daj baihnamz mbin dauqma lo, baenz duz baenz duz douh youq gwnz dienh- sienq, couh lumj baenz aen baenz aen yaemfouz, cingq yienjciengq gij fwendanq seizcin. Dahsau seizcin mbehai song gen, fouxdoengh fwngz- reux, dawz gij heusausau vanq rim daihdeih. Go’nywj iq heuoiq haenx angqvauvau daj ndaw namh ndonj gyaeuj okdaeuj seiqcawq muenghyawj. Dujva hix caenhsim langhhai, loh’ok aennaj riunyumnyum. Gyoengq duz- mbaj gyaeundei ndeu mbin gvaqdaeuj, gyoengqde cingq hoedheux gij va hoengzhoengz heuheu diuqfoux fofo, lumjbaenz cingq angqcoux seizcin daeujdaengz. Gij raemx ndaw dah laeyaengyaeng, rumz saeq baez ci gvaqdaeuj, najraemx fubfub fabfab, geij duz byalwg youq ndaw raemx angqfwngfwng youz bae youz dauq. Goliux hamqdah hix did ngaz lo, nyefaex unqnemnem riengz rumz saeq biyedyed.

Mwngz dingq! Diuz dah iq ngon fwen sadsad, gij sing de baenzlai haeuj rwz ndei dingq; duzgoep hemqngob- ngob; duzrwi youq ndaw cazva aeu va caux dangz yungjriri; roegvaiq- guhvaiqguz heuh “doekceh doekceh”, coi gyoengq nungzminz daxlungz vaiqdi doekceh; byajraez rongx- rumrum, fwncin doeksasa, lumjbaenz cingq yienjciengq hot gyauhyangjgiz couxcin ndei dingq ndeu. Gwnz deih heusumsum haenx, gyoengq lwgnyez vuedbued dwggyaez ndeu cingqcaih doxgyaep guhcaemz, seizseiz cienz daeuj sing riugoekgoek, gyoengqde caenhcingz yiengjsouh gij saedceij ronghndei neix.

Ndaw reihnaz, ndaw suenva, dauqcawq nyouq raen homfwdfwd. Gij va’byaekyouzcaiq henjrwgrwg haenx, gij vaciepcin gimmyigmyig haenx, gij va’ndokgengj hoengzfwgfwg haenx, lij miz gij vayinghvah saekmaeq haenx, gak cungj va doxceng langhhai, dwg baenzlai sawseuq, cingdamh. Raq rumz saeq ndeu ci gvaqdaeuj, heiqva homfwdfwd con haeuj conghndaeng, hawj vunz simsoeng vuenheij.

Fwncin doek sisi sebseb, lumj bwnvaiz, lumj cimva, lumj seisaeq, mbatvang doxsan deihmaedmaed, gou ngiengx fajnaj, hawj raemxfwn fad youq gwnz naj. Gou nyaenx mbouj ndaej iet linx okdaeuj, cimzcimz gij raemxcij daihdeih neix, liengzsisi, diemzsubsub, iemq haeuj ndaw hoz ndaw dungx.

Gij gingjsaek seizcin caen gyaeu ha! De dwg baenzlai ronghsag lai saek, baenzlai unqswnh ndei yawj, baenzlai rangfwd haeuj ndaeng, baenzlai hawj vunz simmaez……

Gou gyaez seizcin gyaeundei neix!

（bouxsij Lij Cingyij bouxhoiz Goenggen）