●Ndwen 3 ngoenz 20, Bingzgoj Yen Cizgenhgiz cujciz bouxvunz hengzfap、bouxvunz gisuz、aen giyez nungzswh swnghcanj daengz mbanjvenj- diemj banggungz Bingzgoj Yen Daibingz Cin Ganh’ai Cunh haiguh nungzswh dwkgyaj hoz- dung. Baez hozdung neix haenqrengz senhconz faplwd fapgvi, fatcuengq gij senhconz swhliu rox nyinh gyaj 380 faenh, yienhciengz ciepsouh nungzhoh camcaz 36 vunzbaez.

(Yiz Siujya)

●Ndwen 3 ngoenz 16, Denzlinz Yen Ding’anh Cin banh “ndwen siucieng” minzsuz vwnzva hozdung. Binaengz liggaeuq ndwencieng ngoenz ceiq byai, vunzlai Ding’anh Cin cungj doxcomz youq giz ndeu, ciengqgo diuqfoux angq- hoh, eiqsei dwg “gvaq cieng liux le, daj liggaeuq ndwenngeih coit hainduj aeu roengzsim ndeindei guh hong lo”.

(Cangh Youjhauz)

●Mboengqneix, Dwzbauj Yen Cuzyungz Cin banh “ngeix haemz naemj diemz caij roenloh laebsim buekguh riengz dangj byaij——hoh ‘sam bet’ byaij- din” hozdung. Hozdung dieg hainduj youq Nenswz Cunh Mbanjlaj, dieg satbyai youq Laujboh Cunh Mbanjgaeuq, daengx diuz loh 18 goengleix. Ganbu ginzcung aen cin neix camgya hozdung haenx riengz mbaw geizhung, ngiengx gyaeuj byaij loh, gig miz gikcingz, langhbaij le gij cingsaenz yienghsiengq ndei.

(Cau Ginhginh)

●Mboengqneix, 10 boux lauxsae Bahmaj Yauzcuz Swciyen Dunghsanh Yangh Youwzyenz、Vwnzcenz Cunh Youwzyenz, youq seiz ban- haemh yungh dingq gyangjco、yawj hag densi daengj fuengsik hagsib yezvu cihsiz, caemhcaiq yungh haiguh gij hingzsik dangzgoenghai, yungh lijlun lienzhaeh saedsaeh, haenqrengz dajcauh aen doih lauxsae youwzyenz miz ciennieb cihsiz he, vih cienzmienh daezsang gij suijbingz son’gyauq lauxsae youwzyenz lajmbanj dwk roengz giekdaej maenhsaed.

(Lanz Veibwz)