Geij bi neix daeuj, Hocouh Si genhciz gvancez gij cwngcwz saw vah minzcuz dangj, cienzmienh doeksaed gij gezcwz baijbouh guekgya caeuq swcigih gvendaengz hong saw vah minzcuz, giethab aen si neix lai aen minzcuz lai cungj vah saedsaeh, nyinhcaen faensik hong saw vah minzcuz gij cingzcik、gingniemh aeundaej caeuq gij vwndiz louzyouq haenx, ra cinj fuengyiengq, doed ok cungdenj, daengx si hong saw vah minzcuz mboujduenh aeundaej cingz- cik moq.

Aen si neix saeqsim maeuzveh caeuq doigvangq hong saw vah minzcuz, doenggvaq “sam nyied sam Bouxcuengh” baenzdauq hozdung angqhoh ngoenzciet、ndwen senhconz minzcuz doxgiet daengj bingzdaiz. Dan youq bi 2017, daengx si venj fukbaengzhoengz senhconz byauhyij miz Cuengh Gun song cungj saw 800 lai fuk(diuz); gaenxmaenx guh ndei hong fanhoiz baiz、yaenqcieng Sawcuengh, yungh Cibgouj Daih dangj hai ndaej baenz guh seizheiq, doiq daengx si guekgya gihgvanh caeuq giyez swyez danhvei、diuzgai segih baiz、yaenqcieng yungh Cuengh Gun song cungj saw guh dukcaz “ngeux gyaeuj yawj”, caemhcaiq vih 700 lai aen danhvei guh ndei hong fanhoiz caeuq saemjdingh baiz、yaenqcieng Sawcuengh.

Doengzseiz, vih gyagiengz hong swnjcienz baujhoh fwen Yauzcuz Hocouh, aen si neix bi 2017 banh le aen ban son’gyauq canghfwen Yauzcuz gaiq daeuz, 55 boux bouxhag camgya haenx daengxcungq dwg canghfwen bouxguhnaz Yauzcuz, caemhcaiq daj 55 boux bouxhag ndawde genjleh ok 16 boux, youq Cauhbingz Yen Vangzyauz Cin banh aen ban daezswng canghfwen Yauzcuz guh son’gyauq moq, canghfwen Yauzcuz camgya haenx gig haenh, aeundaej yaugoj ndei.

Linghvaih, vih fungfouq gij vwnzva saedceij vunzlai minzcuz vunznoix, bi 2017 aen si neix gaenx- maenx bae aenmbanj dieg comzyouq minzcuz vunznoix gyaeujvunz daengz 1000 boux doxhwnj haenx cuengqingj denyingj Vahcuengh、Vahyauz gungh 59 ciengzbaez, bouxyawj minzcuz vunznoix daengz 3 fanh lai boux. Bi 2017, youq Cauhbingz Yen Vangz- yauz Cin Mbanjfungli Mbanjcuengh banh geiqniemh 《Fueng’anq Saw- cuengh》 baecinj fatbouh 60 hopbi vwnzyi yienjok, ndaej daengz vunzlai gak cuz haenhndei.

(Cau Ginhbinh)