Daxbuz Cangh dwg ranznden gou, dou guh ranznden miz haj bi seizgan lo. De dwg boux daxbuz simsienh youh haengj bang vunz ndeu.

Daxbuz Cangh byoem hauswd- swd, najbyak miz haujlai riznyaeuq, aennaj daxbuz Cangh moix ngoenz cungj riunyumnyum, gou roxnyinh de gig hozswnh.

Gou ciengzseiz dingq daxboh naeuz, youq gou seiz iq, bohmeh mbouj ndaej hoengq, daxbuz Cangh couh daeuj ciuqgoq gou, daiq gou bae guhcaemz. Miz baez ndeu, daxbuz Cangh daiq gou bae gunghyenz guhcaemz, gou mbaet duj va ndeu yo youq baihlaeng, heuh daxbuz laep aenda, gou laeglemx dawz dujva baek youq gwnz gyaeuj daxbuz, deq de baez hai da, gou youh yungh gij va gou mbaet haenx, guh lumj dahsien gwnzmbwn vanq va nei vanq roengz- daeuj. Daxbuz Cangh angq dwk fajnaj riunyumnyum.

Ceiq hawj gou hoj lumz dwg baez banringzgvaq ndeu, cuengqhag le, gyoengq doengzhag baema ranz caez lo, caenh gag gou boux dog youq ndaw hagdangz, hagdangz caemrikrik, caenh ndaejnyi sing rumz cifofo, gou naemj: Bingzseiz daxboh gig noix daengz gvaiz, baenzlawz ngoenzneix daeuj ndaej baenz gvaiz ni? Sawqmwh, gou fatyienh boux vunzlaux ndeu, lumj- baenz dwg daxbuz Cangh, caj de byaij engq gyawj, baez yawj, caen dwg daxbuz Cangh dahraix, gou cam:“Daxbuz Cangh, mwngz baenzlawz daeuj lo?” Daxbuz Cangh itmienh uet hanh itmienh naeuz: “Daxmeh mwngz dwk dienhvah hawj gou, heuh gou daeuj ciep mwngz, daxboh daxmeh mwngz miz saeh okbae lo!”

Daj hagdangz daengz ndaw ranz ngamq miz dinjdetdet cib geij faen cung, dou cix byaij baenz buenq diemj lai cung. Daengz ndaw ranz gou, daxbuz Cangh heuh gou sij cozyez, de swhgeij cawj haeux, daxbuz lij bang gou cawj gij dangbyaekheu gou haengj gwn haenx, gou gwn baenz sam vanj hung ne!

Doeklaeng, dou senj ranz lo, hoeng daxbuz Cangh doiq gou gij gvansim caeuq ciuqgoq haenx, gou lij ndaejgeiq youq ndaw uk, miz seiz guh fangzhwnzloq cungj loq raen de. Daxbuz Cangh nienzgeij yied ngoenz yied geq lo, gou muengh daxbuz Cangh ciengxlwenx ndangndaej cangqheiq.

(bouxsij Huz Siujcingh boux- hoiz Goenggen)