3 nyied 1 hauh, Lozcwngz Mulaujcuz Swciyen Daihngeih Siujyoz haiguh bi 2018 seizcin haggeiz haihag denjlij nem gaiq daihngeih ciet vwnzva nienzsug “coux cin bima、ndaw hag muenx fuk” hozdung. Youq ndaw hozdung, aeu nienzgaep、bangaep ma guh gizlanghbaij, gyoengq hagseng bienqbaenz “bouxgaicawx” iq, dawz gijgwn daegsaek cietheiq caeuq vunz ndaw ranz itheij guh haenx hawj doengzhag cimz, caezgya caemhyiengj gijgwn daegsaek, gamjsouh cietheiq nauhyied ndwencieng caeuq cibngux, mizmbangj doengzhag miz dinfwngz haenx doenggvaq raedceij、sij doiqlienz daengj hingzsik soengq hohfuk hawj ngoenzciet.

Mbat hozdung neix, hawj gyoengq hagseng daejniemh vwnzva conzdungj gag miz Cunghvaz minzcuz, caenndang bae gamjsouh gyaeundei vwnzva Cunghvaz minzcuz, sawj aen hozdung conzdungj ndwencieng minzcuz cingzvaiz engqgya noengznwd. (Vuz Siuhyi/吴修奕)