Singgeiz neix, lauxsae heuh dou guh aen cozyez ndeu——youq ranz cauj yiengh byaek ndeu, caiq dawz ginggvaq sij roengzdaeuj. Mwh yawj daengz aen cozyez neix, gou doeksaet liux, sim naemj：Gou mbouj rox cauj byaek bw! Vihmaz lauxsae heuh dou guh aen cozyez neix ne? Gou daiq dwk ngeizvaeg yawj coh lauxsae, hoeng lauxsae gaenbonj mbouj fatyienh gou, gou saetmuengh liux, mboujgvaq, cungj mbouj naengz mbouj guh cozyez ba!

Ma ranz le, mbouj miz banhfap, gou cijndaej gietdingh youq singgeizroek cauj yiengh byaek ndeu lo.

Ngoenz singgeizroek, gou hwnqmbonq le, couh bae sij cozyez lo, hoeng aenvih cozyez noix gou gig vaiq couh guh sat lo, cij lw cauj byaek aen cozyez neix caengz guh lo. Gou gig mbouj cingznyienh bae daengz fuengzdajcawj, doq byaij doq naemj：Cauj gijmaz ndei ne? Doeklaeng, gou gietdingh guh makyungz cauj gyaeqgaeq yiengh byaek neix. Gou sien dawz song aen makyungz, sam aen gyaeqgaeq caeuq song aen vanj daeuj, yienz- haeuh couh doengh goeng lobw. Daih’it, gou ronq makyungz gonq, dawz makyungz ronq baenz baenz- naed iq, yienzhaeuh coux haeuj aenvanj bae; riengzlaeng, dawz sam aen gyaeqgaeq dub roengz aenvanj wnq bae, roengz gyu, hoed yinz; doeklaeng, hai feiz ndat rek le ndingq lauz roengz gonq, yienz- haeuh ndingq gyaeqgaeq roengz, caiq ndingq makyungz roengzbae, fan cauj geij baez, hai feiz iq caiq cauj yaep ndeu, ndaep feiz, daek hwnj, deb byaek makyungz cauj gyaeqgaeq ndeu couh cauj ndei lo. Gwnngaiz seiz, gou gwn gij byaek bonjfaenh cauj haenx, ndawsim roxnyinh vuenyungz dangqmaz.

Cauj byaek caen mizyinx ha.

(bouxsij Lij Minz bouxhoiz Ouh Caijfangh)