Ciuhgonq, miz boux vuengzdaeq ndeu, de miz sam boux lwg, lwghung caeuq lwg daihngeih cungj gig coengmingz, hoeng, lwg daihsam, vunz lauxsaed, daihgya cungj heuh de bouxhuk.

Vuengzdaeq laux lo, siengj aeu lwg he daeuj naengh vih de, couh doiq sam boux lwg naeuz: “Sou sam boux neix, boux lawz ndaej daengz fan damj ceiq gyaeundei he gyau hawj gou, bouxde couh ndaej dang vuengz.”

Gangj sat couh dawz sam diuz bwn boq le boq, ciepdwk gangj:“Sam diuz bwn neix gak mbin bae gizlawz, sou couh byaij coh gizde.”

Diuz daih’it yiengq baihdoeng mbin, lwghung couh yiengq baihdoeng byaij bae; diuz daihngeih yiengq baihsae mbin, lwg daihngeih couh yiengq baihsae byaij bae lo; diuz daihsam yiengq baihnaj mbin le mbouj geij nanz couh doek roengzdaeuj lo.

Bouxhuk byaij daengz giz bwn doek haenx, yawjraen henz diuzbwn miz aen bakdou he.

De hai bakdou, fatyienh miz aen congh he, youh miz aenlae doeng daengz baihlaj, de couh riengz aenlae byaij roengz laj bae, yawjraen miz haujlai goepsou lwg, ndawde miz duz goepsou hung bizbwdbwd ndeu. Goepsou hung cam de siengj aeu gijmaz doxgaiq, de naeuz siengj aeu fan damj ceiq gyaeundei he.

Goepsou hung hemq gyoengq goepsou iq dawz daeuj aen hab hung he, daj ndaw dawz ok fan damj gig gyaeundei he.

Song daeg go de cungj nyinhnaeuz daegnuengx de huk lai, gijmaz doxgaiq hix ra mbouj ndaej. Gyoengqde cungj mbouj siengj ok gijmaz rengz, couh hixnaengz duet vaqbuh roengzdaeuj, dawz dauqma hawj vuengzdaeq lo, daegnuengx huk cix dawz fandamj ceiq gyaeundei he gyau hawj vuengz- daeq.

“Ciuq gvidingh wngdang hawj nuengx iq daeuj dang vuengz.” Vuengzdaeq gangj. Hoeng song boux daeggo de couh doxceng hwnjdaeuj, cungj naeuz nuengxhuk de mbouj miz maz bonjsaeh, naengh mbouj ndaej vuengzvih, cungj heuh vuengzdaeq caiq ok diuz daez ndeu.Vuengzdaeq mbouj miz banhfap, couh naeuz:“Sou sam beixnuengx byawz aeu ndaej aen haedfwngz ceiq gyaeu he okdaeuj, byawz couh nbaej dang vuengz.” Gangj sat, de ciuqyiengh boq sam diuz bwn daeuj gietdingh byawz yiengq mbiengj lawz byaij bae.

Diuz bwn nuengxhuk youh doek youq dieg gaeuq, de couh byaij roengz laj bae, duz goepsou hung aeu aen haedfwngz ceiq gyaeundei he hawj de. Hoeng song daeg go de, cij ra ndaej aen giendiet he dang haedfwngz gyau hawj vuengzdaeq. Vuengzdaeq couh hawj nuengxhuk dang vuengz lo.

(指导老师 龙庆煜)