[Vah bouxbien] Vangz Cinzsinh dwg Vujsenh Yen Sinhlungz Siujyoz hagseng, dwg hag Sawcuengh biubing. Youq mwh genj bae Gvangjsih Daihseiq Gaiq Daengx Gih Siujhagseng Gangj Gojgaeq Biucinj Vahcuengh Doxdax, de caeuq baengzyoux ndei Veih Yiyez、Liu Gyahcing caez ndaej genjhwnj. Mwhde lauxsae mbouj daezhawj gojgaeq hawj gyoengqde. Vangz Cinzsinh couh gag daezok youz de daeuj sij gojgaeq camgya doxdax. Vangz Cinzsinh gag bien gojgaeq gag baizlienh, youq ndaw doxdax, Vangz Cinzsinh ndaejdaengz ngeih daengj ciengj, Veiz Yiyez caeuq Liuz Gyahcing gangj aen gojgaeq Vangz Cinzsinh sij haenx hix faenbied ndaejdaengz sam daengj ciengj. Youq geizneix caeuq geizlaeng youq banj neix baenbied daengh ok sam bien gojgaeq Vangz Cinzsinh sij haenx.

Ciuhgonq, miz boux vunz ndeu, heuhguh Luzgeu, ranz de gig hoj, hoeng, de gig coengmingz. Miz boux vunzfouq he, de miz sam dah lwgsau, miz dah he raen Luzgeu coengmingz, couh haq hawj de, song dahcej couh haq hawj bouxvunz ranz miz ngaenz.

Miz ngoenz ndeu haetcaeux, Luzgeu bae ranz yahdaiq guhcaemz, seizneix, yahdaiq de cingq youq ndaw cauq mienh cawj haeux mienh saz ceiz. Luzgeu baez byaij daengz bakdou couh daihsing hemq: “Yahdaiq, gou ma lo! Ndaej gwn haeux caengz?” Yahdaiq baez dingq, ndawsim gag ngeix: Mwngz lwg fangz neix, caeux mbouj ma ceiz mbouj ma, bienbien ngoenzneix gou saz ceiz, mwngz couh ma, bouxlawz mbouj rox mwngz siengj gwn ceiz gou! Hoeng, siengj gwn ceiz gou, mwngz loq fangzhwnz bae ba! Hoeng, Luzgeu youq rog gaenq nyaeuq daengz heiq saz ceiz. De couh byaij haeuj ndaw ranzcauq bae, riunyumnyum dwk lwnh yahdaiq: “Yahdaiq, ngoenzneix gou dauqma seiz yawjraen miz vunz dawz duzma ndeu daeuj rauqnaz!”Yahdaiq mbouj rox Luzgeu yaeuh de, couh geizheih dwk cam de: Dwg caen ha? Duzma baenzlawz rauq ndaej naz? Mwngz hag hawj gou yawjyawj!” Luzgeu baez dingq, ndawsim gag angq, couh dawz diuz faexdeuq daeuj youq ndaw daeuh “cae”, yahdaiq raen le, lau dwk hemq hwnjdaeuj:“Mbouj! Mbouj! Mbouj ‘cae’ lo! Gou cingq youq ndaw saz ceiz ne!” Luzgeu baez dingq, riuhaha naeuz: “Rauqnaz ndaej gwn haeux, cae daeuh ndaej gwn ceiz. ”

Gienh saeh neix gvaq le mbouj geij nanz couh gvaq cieng lo. Mwh ndaw cieng bae ranzdaiq, Luzgeu dwg byaij loh bae, lingh song lwggwiz dwg gwih max bae. Gwn caeuz sat baiqninz lo. Yahdaiq couh dawz fancien caeuq moegdenz daeuj hawj song boux lwggwiz fouq ninz, hoeng, Luzgeu cix ninz youq ndaw mbonq- fiengz, Luzgeu yied siengj yied hozndat, yahdaiq baenzlawz baenzneix yawj mbouj hwnj bouxgungz da? De ngeix le ngeix, ngeix ndaej aen geiqmaeuz ndeu okdaeuj. Byongh- hwnz, de laeglemx hwnjdaeuj, ndonj haeuj ndaw rienghmax bae, dawz rieng song duz max doxcug hwnjdaeuj, song duz max neix sikhaek doxdik lo, de couh buet dauqma, lwnh song lwggwiz haenx:“Mbouj ndei lo! Mbouj ndei lo! Max sou doxdik lo!”Song lwggwiz haenx baez dingq, couh gipmuengz buet bae yawj, Luzgeu couh ndonj haeuj ndaw denz bae ok haex. Dang song lwggwiz haenx dauqma ninz seiz, nyouq raen haeu, hainduj cungj laih doiqfueng ok roet, hoeng, dang gyoengqde hwnjdaeuj yawj seiz, fatyienh ndaw denz miz haex, gyoengqde cungj mbouj ndei eiqseiq, youq byonghhwnz deuz ma lo.

Ngoenz daihngeih haetromh, yahdaiq mhouj raen gyoengqde hwnq- daeuj, bae yawj, raen gwnz mbonq fancien moegdenz cungj dwg haex, hozndat ndaej mbouj rox baenzlawz gangj. Cingq youq seizneix, Luzgeu couh doiq de gangj:“Mbouj yungh ndaej lo, hawj gou dawz bae laj dah coemh ba?”Yahdaiq ngeix hix mbouj ngeix couh dapwngq lo. Luzgeu bae daengz henz dah, couh dawz nywj caeuq fiengz gyoeb hwnjdaeuj coemh, gij hoenz gig hung, yahdaiq youq ranz cungj yawj ndaej raen, ndawsim gag naeuz: Lwg fangz neix caen dwg dawz bae coemh lo. Hoeng, de mbouj rox, luzgeu gaenq dawz cien caeuq denz swiq seuq rap ma ranz lo.

(指导老师 龙庆煜)