1 nyied 16 hauh banhaet, baenz daeh baenz daeh buhvaq haizmad daengj gvaq doeng doxgaiq cungj deng buen haeuj aen hagdangz Vanzgyangh Mauznanzcuz Swciyen Cangzmeij Yangh Aidung Cunh Aidung Siujyoz, hawj daengx hagdangz lauxsae caeuq hagseng cungj angqwtwt.

Gaenh duenh seizgan neix mbwn nit raixcaix, Cangzmeij Yangh Aidung Cunh haeuj mbanj gunghcozdui haeuj mbanj seiz yawjraen, Aidung Siujyoz haujlai hagseng hwnjdangz seiz lij daenj buhgendinj caeuq liengzhaiz, cam rox ndawde dingzlai cungj dwg hagseng gungzhoj caeuq lwgnyez louzyouq. Yienghneix aen yangh neix couh cujciz ganbu doenggvaq meizdijmoq yiengq sevei gak gyaiq vunzsimndei gouz gien gvaq doeng buhvaq daengj doxgaiq, lij gig vaiq ndaej daengz yiengjwngq. Haujlai giyez、gagvunz cungj vih gyoengq lwgnyez geiq daeuj gak cungj gvaqdoeng doxgaiq. Daengz seizneix, itgungh sou ndaej daengz sevei gak gyaiq vunzsimndei gien haiz 327 doiq, mad 134 doiq, vaq 9 diuz, buh 30 diuz, daehsaw 4 aen, gungh dij ngaenz mauhgvaq fanh maenz.

(Veiz Yui/韦 睿 Veiz Yingj/韦 颖 )