Yungzsuij Myauzcuz Swciyen dangguh aen yienh guekgya cungdenj bangfuz haifat, mboujduenh doicaenh minzcuz daegsaek gyauyuz dijhi gaijgwz, doicaenh yivu gyauyuz bingzyaenx hwngfat, hawj gij cing- saenz “yawjnaek bangfuz caez bang ceiq、bang caizganq dox giethab” ndaw baugau Cibgouj Daih dangj haenx youq Mbanjmyauz ndaej doek deih maj rag, dawz gij rag gungzhoj cawz bae. Yungzsuij mboujduenh cungjgez gij gingniemh minzcuz daegsaek banhhag, dawz hagseng gungzhoj minzcuz vunznoix 20 aen yanghcin sam faenh cih ngeih senj daengz ndaw yienh doegsaw, ndaw yienh gyalai hagvih 12000 lai aen, caemhcaiq youq siujyoz、cuhcungh、gauhcungh gak laeb aen minzcuz hagdangz ndeu, ndawde hagseng minzcuz vunznoix ciemq 80% doxhwnj, seizneix doenghgij hagdangz neix gaenq hwngfat baenz daengx yienh haujlai hagdangz ndawde hagdangz banhhag ceiq miz daegsaek. Gak aen minzcuz hagdangz laeb miz aenban minzcuz 2 aen doxhwnj, yiengjsouh guekgya gak hangh cwngcwz ndei doiq hagseng minzcuz vunznoix caeuq gij cwngcwz haeujcoengh ndaw yienh daegbied dingh’ok haenx.

Ciuq cam rox, Yungzsuij binaengz bued cienz 30 fanh maenz haeujcoengh gak aen hagdangz haiguh minzcuz vwnzva haeuj hagdangz hozdung, buek hagdangz aeu Yungz- suij Minzcuz Cunghyoz、Yungzsuij Minzcuz Siujyoz guh daiqbiuj haenx, yungh gij vwnzva minzcuz vunznoix bang doi hagdangz daegsaek hwngfat, saedyienh vanzging son vunz、hoz- dung son vunz、vwnzva son vunz. Hagseng daj doenghgij hagdangz neix bizyez, mboujdan rox saw rox leix, haujlai lij rox eu Fwenmyauz、diuq Fouxmyauz, youq gak aen lingjyiz fat rongh fat ndit.

Hawj lwgnyez dieg gungzhoj hwnjhag ngaih、hwnjhag ndei, dwg diuzroen youqgaenj gatduenh gij gungzhoj daihdaih doxcienz haenx, Yungzsuij Myauzcuz Swciyen ciuq dieg bae guh, dawz minzcuz vwnzva daegsaek yungzhaeuj gyauyuz sonhag gaijgwz gak fuengmienh, byaij ok diuz roen ndei bang ceiq youh bang caizganq ndeu.

(Cinz Conhvaz)