●Bi 2017 ndwen 12 ngoenz 30, youq Liujcouh Si Sanhgyangh Dungcuz Swciyen Liengzgouj Yangh Bwzmauz Cunh Mbanjdangzgung, 12 ranz ranzgungzhoj aenvih ndaej ik gij cwngcwz senj dieg bangfuz senj ranz ndaej senj haeuj ranzmoq, yungh cungj fuengsik daegbied neix angqcoux bi moq daeujdaengz. Bi 2016 doxdaeuj, aen yienh neix gyalai ligdoh senj dieg bangfuz senj ranz, dajveh yungh 3 bi hwnjguh 30 aen hanghmoeg senj dieg bangfuz senj ranz, daengz bi 2017 daej, gaenq guhsat hanghmoeg 19 aen, mauhgvaq 3800 ranz ranzgungzhoj lingx ndaej yaekseiz ranzmoq.

(Liz Hanzsiz)

●Bi 2017 doxdaeuj, Denz- yangz Yen Minzyijban haenqrengz haiguh cinjcing gapdoiq bangfuz, cietsaed gaijgez gij saedsaeh hojnanz vunzlai gungzhoj, vih cinjcing vut gungz caux mizleih diuzgienh. Seizneix, aen minzyijban neix bangfuz Nazmanj Cin Sinhlouz Cunh 35 ranz ranzgungzhoj cungj daengz “bet miz it mauh” vut gungz biucinj, bang doi Sinhlouz Cunh daengx cunh ciuq seiz vut “aenmauh” gungzhoj bae.

(Maj Nizya)

●Mboengqneix, Denzlinz Yen Luzlungz Cin senhconz gij cingsaenz Cibgouj Daih dangj Vahcuengh Heiqcuengh “gvaengh daengq” vwnzyi yienjok faenbied youq Dunglung Cunh caeuq Luzlungz Cunh yienj. Vanjvei miz vaiqbanj Vahcuengh、gofoux Bouxcuengh、Heiqcuengh siujbinj daengj lai cungj biujyienj hingzsik, dawzndaet gij cingsaenz Cibgouj Daih dangj, senhconz leihnungz cwngcwz、fanj dam fanj nduknaeuh、lajmbanj bienqvaq moq daengj. Yienjok yienh’ok le gij cingsaenz yienghsiengq aen cin neix gaenxmaenx doxhwnj, caux ok le gij vwnzva heiqfaenh naekna.

(Liengz Yuijyuij)

●Mboengqneix, Nanzdanh Yen Cwngzgvanh Cin comz baenz aen duenzsenhgyangj “daengqgeg” vah minzcuz vunznoix, bae gak mbanj, yungh Vahcuengh、Vahyauz daengj vah minzcuz vunznoix gangj gij cingsaenz Cibgouj Daih dangj hawj vunzlai gak cuz, hawj vunzlai dingq rox, maij dingq, yungh vah minzcuz depgaenh vunzlai, yungh vahgyasaeh cienz gvancez cingsaenz, gejgangj gij vwndiz caeuq cwngcwz vunzlai ceiq gvansim haenx.

(Sunh Yaujgen)