Gou youq Nanzningz doegsaw gvaq, youq ndaw aen yozyau Nanz- ningz haenx, gou gamjsouh daengz le gij heiqfaenh vwnzva ciuhgeq Boux- cuengh gig naekna. Duenh seizgan gyaeundei haenx hawj gou nanzlumz, hawj gou ciengzseiz dauqngeix.

Bouxcuengh miz haujlai minzcuz vwnzva maenhndei, eufwen couh dwg cungj vwnzva maenhndei ciuhgeq Bouxcuengh ndeu. Bouxcuengh miz gvaq boux sienfwen ndeu——Liuz Samcej. Gangj daengz Liuz Samcej, mbouj naeuz caezgya cungj rox de. Gij singfwen de sep lumj aen lingzngaenz nei, hawj vunz dingq le simfiz bae. Aen hagdangz dou ciengzseiz haiguh eufwen hozdung, hagdangz biujyienj eufwen seiz, gwnz daizheiq ndwn miz geij boux daeggo dahcej, gyoengqde biujyienj doiqfwen, doq ciengq doq foux, bouxboux singfwen lumj Goahniuz iq caeuq Liuz Samcej iq nei, aen ndang reuzred unqnemq gig ndei yawj. Aenvih gou dwg Myauzcuz, dingq mbouj rox gyoengqde ciengq gijmaz, ndigah gij baengzyoux youq henz gou doq yawj doq fanhoiz hawj gou rox. Dingq gyoengqde fanhoiz le gou dingq rox gij fwen ndei dingq neix gangj gijmaz lo, caiq dem dingqnyi gij yaem ndei dingq haenx, hawj gou fizfefe!

Ndaw hagdangz dou mboujdan miz gij fwen maezvunz, lij miz haujlai guh’angq mizyinx dem. Lumjbaenz, caij maxfaex, ringx gengxdiet, bau lwgdomq daengj, gak cungj guh’angq ndei caemz haenx geq mbouj rox liux. Gij ceiq haengj guhcaemz gou couh dwg ringx gengxdiet lo.

Ringx gengxdiet miz di hoj, yaekaeu nyinhcaen lienh cij ndaej. De youz aen gengxdiet ndeu caeuq diuz ngaeudiet ndeu gyoebbaenz, baez guhcaemz de dawz ngaeudiet daep youq gwnz gengxdiet, yienzhaeuh menhmenh nyoengx coh baihnaj. Seiz nyoengx gengxdiet, yaekaeu gaemdawz doxbingz, mboujne gengxdiet couh ngenglaemx, couh ringx mbouj roengzbae lo. Danghnaeuz dawz ndaej bingzonj, couh ndaej nyoengx gengx- diet daengz dieggatsat, couh suenq doxdax ndaej hingz. Caiq miz di doxdax haemq hoj, couh dwg youq gwnz roendoxdax ngutngut ngeuingeui haenx riengjretret nyoengx gengxdiet daengz diegsatbyai. Miz baez ndeu, hagdangz dou guh baez ringx gengxdiet doxdax ndeu, couh dwg youq diuz roendoxdax neix doxdax. Doeklaeng ban dou ndaej baizmingz youq gaxgonq, gou haisim raixcaix.

Ndaw ndwenngoenz youq aen siujyoz Nanzningz doegsaw haenx, gou mboujdan roxnyinh gij minzcuz vwnzva Bouxcuengh, lij hag rox le di Vah- cuengh. Bouxcuengh lij miz haujlai fungsug caeuq conzdungj minzcuz, caiqlij miz haujlai gojgaeq, yaekaeu dou bae hag rox caeuq gamjsouh de, raeuz cungj rox, Bouxcuengh dwg aen minzcuz youh lauxsaed youh gyaezhek ndeu bw!

(bouxson: Yangz Senhvah bouxhoiz: Goenggen)

我曾在南宁读书，在首府的那所学校里，我感受到了浓厚的壮族传统文化氛围。那段美好的时光让我难忘，令我时常回忆。

壮族有许多优秀民族文化，唱山歌就是壮族优秀传统文化之一。而壮族曾经还有一位歌仙——刘三姐。说到刘三姐，想必大家都很熟悉。她的歌声银铃般清脆，使人听了沉醉。我们学校经常开展唱山歌活动，学校表演唱山歌时，舞台上站着几位哥哥姐姐，他们表演的是对歌，边唱边舞，个个声音像小阿牛哥和小刘三姐，动作婀娜多姿很好看。因为我是苗族，听不懂他们在唱些什么，所以我身边的朋友边观看边给我翻译。听了翻译后我懂得了动听的山歌内容，再加上听到那美妙的旋律，已经足够让我如痴如醉！

我们校园不仅有迷人的壮族山歌，还有许多有趣的小游戏。比如：踩高跷、滚铁环、抛绣球等，各种好玩的游戏数也数不尽。我最喜欢玩的就是滚铁环了。

玩滚铁环有点难度，需要认真练习。它由一个铁圈和一根铁钩组成，玩的时候将铁钩钩在铁环上，然后往前慢慢推去。在推铁环时，必须要保持平衡，否则铁环就会歪倒，这个游戏也就进行不下去。如果掌握了平衡，就能将铁环以最快的速度推向终点，取得比赛的胜利。再有点难度的比赛，就是弯弯曲曲的赛道上将铁环推到终点。之前，我们学校有一次滚铁环比赛，就是在这样的赛道上进行。最终，我们班取得了好的名次，我很开心。

在南宁那个小学读书的日子里，我不仅了解了壮族的民族文化，还学会了壮族的一些语言。壮族还有很多的民族风俗和传统，当然还有许多故事，需要我们去深深地了解和感受，要知道，壮族可是一个淳朴又好客的民族哦！

（指导老师：杨鲜花）