Gij saeh moix ngoenz hawj gou ceiq angq haenx couh dwg lienh dik lwggienq.

Neix mbouj dwg ma, ma daengz ranz, gou youh dawz aen lwggienq nyinhcaen dik hwnjdaeuj, hoeng de baez daengz ndaw fwngz gou, mbouj dingq gou sawjyungh, gou baez dik, de couh doek roengz gwnz deih, lumjbaenz yiengq gou doxnyex: “Daeuj lo, daeuj lo, dik mbouj dawz……”

Ngamq hainduj gou caenh dik ndaej saek song aen, hoeng gou mbouj doeknaiq, laebdaeb lienh dik. Yienz- naeuz aennaj gou mbaet ndaej hoeng- fodfod, hoeng gou couh mbouj saenq ceihfug mbouj ndaej aen lwggienq neix. Yienghneix, gou sikhaek gip de hwnjdaeuj, caiq dik, naemjnaemj gij fuengfap youqgaenj bouxwnq son gou haenx, mbouj dingz haglienh, doek- laeng, dik ndaej seiq haj aen lo, ndawsim gou gaej naeuz miz geijlai angq ho! Gou engqgya mizyinx lo, ngoenzngoenz lienh, ciemhciemh, gou gingqyienz dik ndaej bet gouj aen lo.

Doq dik doq dik, gou sawqmwh fatok cungj siengjfap geizgvaiq ndeu, siengj guh aen dungcoz ndei yawj ndeu, yienghneix, gou gaem aen lwggienq baez gveng coh gwnzmbwn, cunjbei fan din dik doxhwnj, hoeng mbouj naemj daengz capmax mbouj maenh, ga’gvaz baez unq, “budung” sing ndeu, gou doq laemxbob roengzbae, in dwk gou hemqvauvau, hoeng gou mbouj lau, dauqcungz gip aen lwggienq hwnjdaeuj, gou siengsaenq, gou itdingh ndaej hawj de dingq gij vah gou.

Yienznaeuz gou seizneix cij dik ndaej geij aen, hoeng, gou yaek engqgya roengzrengz, ceng’aeu dik ndaej engq lai. Dik lwggienq gawq ndaej lienh ndang gou, youh ndaej lienh gou hozraez, caen dwg gienh saeh ndei guh it ndaej sueng ndeu.

(bouxsij: Hoz Gyahvanz boux- hoiz: Goenggen)