12 nyied 16 hauh, geiqyinhyoz feihyiz Gujyoz youz Cungguek Vwnzvuz Baujhoh Gihginhvei Feihvuzciz Vwnzva Yizcanj Baujhoh Cienhangh Gihginh Guenjleix Veijyenzvei cawjbanh haenx, nem hawgo Bouxcuengh swnjcienz baujhoh baenzdauq hozdung youq Namzningz Gujyoz gawjheng. Lungzlinz “Yezdungzlingz” Myauzcuz ndawbiengz yizsuzdonz《Goangq Lungzlinz》cienzciengz yenzswnghdai yinhyozvei byaij haeuj geiqyinhyoz feihyiz Gujyoz.《Mbungqmbaj Mbin》、《Iu Daeggo Daeuj Dak Ronghndwen》、《Anghoh Cietdiuqbo》 daengj golaux feihyiz cungj yinx ndaej haujlai vunzlai humx yawj. Doengzseiz gij ndangdaenj gyoengqde hix yinx ndaej haujlai vunz cim yawj.

Ciuq cam rox, mbat geiqyinhyoz dieg gawjbanh——Cungguek - Dunghmungz Gujyoz Feihyiz Vwnzvacunh, dwg aen hanghmoeg youqgaenj daegsaek vwnzva binjbaiz Namzningz Si Cinghsiu Gih gungganq he, hix dwg aen hanghmoeg doxgap yienghceij Gvangjsih feihyiz swnjcienz、baujhoh、cauhmoq caeuq hwngfat he.

(Yangz Dwnghliengz/杨登良)