Ndwen 11 ngoenz 30, 《Namz- ningz Si Gaiq Daihcibseiq Yinzda Cangzveij Haj Bi Laebfap Gveihva》 ginggvaq Aenhoih Baez Daihbet Namzningz Si Gaiq Cibseiq Yinzda Cangzveijvei saemjlwnh caemhcaiq biujgiet doenggvaq. Liedhaeuj haj bi coglaeng laebfap gveihva laebfap hanghmoeg gungh miz 38 gienh, ndawde coihgaij hanghmoeg 16 gienh、laebmoq hanghmoeg 22 gienh. 《Diuzlaeh Ndawbiengz Sawjyungh Guenjleix Sawcuengh Namzningz Si》 dangguh gij hanghmoeg lizsij vwnzva baujhoh fuengmienh ndaej liedhaeuj laebfap gveihfan, gig miz deihfueng daegsaek.

Gaenh 5 bi neix daeuj, Namz- ningz Si doenggvaq gyagiengz hong Sawcuengh Vahcuengh fazci gensez caeuq guhhong gveihva, vih hong doihengz Sawcuengh daezhawj bauj- cang rengzrwd. Bi 2013 ndwen 5, Namzningz Si daiqdaeuz youq daengx gih yungh gij fuengsik laebfap daeuj doihengz caeuq gveihfan sawjyungh Sawcuengh, fatbouh le 《Gij Banhfap Ndawbiengz Sawjyungh Guenjleix Sawcuengh Namzningz Si》 cwngfuj gveihcangh Guengjsae bouh daih’it hong saw vah minzcuz vunznoix, youq bihaenx ndwen 7 ngoenz 1 hainduj hengzguh, neix hauh’ok hong Saw- cuengh daengx si cugyamq hamj haeuj diuz roen fapceihvaq. Neix mboujdan doiq coicaenh Sawcuengh gveihfanva、byauhcunjva gensez miz leih, lij doiq yienh’ok gij daegsaek minzcuz dieg gagguenj minzcuz、daezsang gij simgagsaenq minzcuz vunzlai Bouxcuengh、hezdiuz minz- cuz gvanhaeh miz cozyung gaenx- maenx. 《Banhfap》 saedhengz 4 bi lai daeuj, laebfap yaugoj haemq ndei. Bi 2015, si yinzda cangzveijvei aeu ndawbiengz sawjyungh guenjleix Sawcuengh dingh baenz nienzdoh deihfuengsingq fapgvi laebfap diu- yenz hanghmoeg, yaek aeu 《Gij Banhfap Ndawbiengz Sawjyungh Guenjleix Sawcuengh Namzningz Si》cwngfuj gveihcangh seizneix hengz haenx swng baenz deihfuengsingq fapgvi, doiq gij gvaengxlaengx、gveihfan yungh Sawcuengh Vah- cuengh daengj guh’ok mingzdingh caeuq gveihfan, vih hong Sawcuengh Vahcuengh aen si neix daezhawj fapceih baujcang.

(Veiz Yinjsenz/韦尹璇)