Miz boux vunz yienghneix, gou sugnaj de mbouj ndaej caiq sug lo. De ya, daemqdetdet, faj naj lumj yiengh cehgve iqetet, baihlaj meizda caxcangcang haenx maj miz fouq da daj haet daengz haemh lumj caengz ninz ndiu ndeu. Hawj vunz ndeiriu dwg, de yienznaeuz doeg seiq nienzgaep lo, hoeng lij lumj lwgnyez youwzyenz ityiengh, mboujlwnh daenj gijmaz vaq, cungj cug mbouj ndaet, ciengzseiz loh gumqhangx okdaeuj, hawj lauxsae caeuq doengzhag yawjraen le cungj riu dwk bak ngeng bae. Baez daengz seizneix, de cungj mbouj najmong saekdi. Cij raen de riujriuj gyaeujvaq, niujniuj diuzhwet, couh fwt ndonj haeuj ndaw vunzdong bae lo.

Gaej yawj de daemqiq, hoeng de coengmingz raixcaix, ciepsouh naengzlig hix gig giengz. Youq yozyau, de camgya le soujfungh- ginz beizyinbanh. Moix baez lienhhag rag gimz, de cungj gyaez doeng ngonz sae muengh, hix ciengzseiz lumz lienh gij cozyez lauxsae buci ma ranz lienh haenx, cigdaengz lauxsae genjcaz ngoenz gaxgonq banhaemh, de cij gipgip muengzmuengz lienh yaep ndeu. Hwhw, naeuz daeuj hix geizgvaiq, caenh’aeu de haeujsim bae lienh, mbouj yungh diemj cung ndeu, soujfunghginz couh youq ndaw fwngz de sohsoh rag ok baenz hot baenz hot go ndei dingq daeuj. Deq daengz ngoenz daihngeih lauxsae genjcaz, de caiqlij ndaej bingz daengz bet goujcib faen ni!

De vunz haengj daej. Mbouj- lwnh saeh hung saeh iq, caenh’aeu mbouj ei de, de couh gvaengxda bienq hoengz, aenndaeng bienq soemj, riengz daeuj raemxda lumj myaiz ityiengh gag rihnongnong. De yienznaeuz gyaez daej, hoeng lij dwg euq mbouj gvaq vunzhung, cij ndei lauxlaux saedsaed dingq vunzhung cijveih.

Miz haemh ndeu, daxmeh heuh de sij ngoenzgeiq, de dauq laih youq baihnaj densigih mbouj haengj nod din, gij raemxda utheiq de baez naed baez naed loenq- byoegbyoeg. Baez yienghneix, daxmeh de yaep he gangj dauhleix, yaep he gangj vahriu. Doq gangj doq gangj, de sawqmwh guh daej bienq riu, daiq aen naj lij uq raemxda haenx bae sij ngoenzgeiq lo.

Gyoengq doengzhag, mwngz cai yawj, boux siuj baengzyoux youh ndeiriu, youh diuqbeiz, youh dwggyaez, youh coengmingz neix dwg byawz? Lauxsaed lwnh sou nyi ba, de couh dwg gou lo!

(bouxsij: Seiq nienzgaep Fu Yijsenh bouxhoiz:Goenggen)