Vih geiqniemh Gozvuyen fat- bouh 《Fueng’anq Sawcuengh》 60 hopbi, Gvangjsih Sawcuengh Hag- dangz、 Gvangjsih Minzcuz Cungh- dwngj Conhyez Hagdangz、 Gvangj- sih Minzcuz Gauhcungh mboengq- neix guh buek hozdung ndawhag vwnzva, langhbaij gij cingzcik aen hagdangz neix 60 bi doxdaeuj haenqrengz guh hong Sawcuengh guh baenz haenx. Gij hozdung neix youz ndawhag aen cungsim vahsaw caeuq vwnzva Bouxcuengh guhdaeuz daeuj guh.

Youq gij hozdung neix, “Langhbaij gij cingzcik Sawcuengh sonhag yenzgiu”, cujyau langhbaij gij cingzcik ndawhag lauxsae 60 bi doxdaeuj guh hong Sawcuengh sonhag yenzgiu aeu ndaej, cujyau dwg gij cingzcik gyoengq lauxsae sonhag Sawcuengh caeuq bienok sawson Sawcuengh、fanhoiz sawyw minzcuz、 aeu Vahcuengh hawj densi denyingj boiqyaem daengj fueng- mienh aeu ndaej. “Lauxsae hag- seng aeu Sawcuengh doxdax daeuj sij faenzcieng” dwg doenggvaq cungj fuengsik aeu Sawcuengh sij faenz- cieng, gangj ok gij goj mizyinx gyoengq lauxsae caeuq hagseng ngoenznaengz hag yungh Saw- cuengh. “Doxdax aeu yaembiucinj Vahcuengh daeuj gangj goj” doenggvaq gyoengq senjsouj aeu Vahcuengh biucinj youq gwnz daizheiq lumjlili dwk gangj goj, hawj hagseng miz cungj naengzlig gangj vahyaem Vahcuengh byauhcunj gangj ndaej engq raeuzred. “Aen gyangjco minzcuz vwnzva ndawhag” cix doenggvaq cingj boux gyausou daeuj ndawhag guh gyangjco, hawj lauxsae hagseng engq ndei rox daengz dangqnaj gij cwngcwz vahsaw minzcuz dangj raeuz guek raeuz, gij saedsaeh yiyi cauhguh Sawcuengh caeuq yungh Sawcuengh. “Aen vwnzyi vanjvei vahsaw Cuengh Gun” dwg doenggvaq gij yisuz hingzsik caen da yawj raen hawj gyoengq lauxsae hagseng roxnyinh daengz gij goengnaengz daegbied Sawcuengh youq ndaw swnghhoz. Doenggvaq doenghgij hozdung neix, hawj daihgya engq cienzmienh roxyiuj gij lizsij Sawcuengh fazcanj, haigvangq gij cihsiz siyej gyoengq lauxsae hagseng, hawj sevei gak gyaiq engq ndei daeuj liujgaij dangqnaj gij sevei cozyung Sawcuengh miz cozyung haemq ndei.

（Dwngz Mingzsinh/滕明新）