Ndwen 11 ngoenz 29, Aenhoih Geiqniemh Gozvuyen Fatbouh 《Fueng’anq Sawcuengh》 60 Hopbi Caeuq Byaujcangh Senhcin Hong Vahsaw Minzcuz Vunznoix Guengjsae youq Namzningz hai. Swcigih Dangjveij suhgi Bungz Cinghvaz camgya hai hoih, Swcigih cujsiz Cinz Vuj youq gwnz hoih gangjvah, caemhcaiq doengzcaez fat ciengj hawj boux daiqbiuj ndaej ciengj.

Vahcuengh dwg vahcoj beksingq Bouxcuengh daihdaih yungh, hoeng youq duenh lizsij seizgeiz haemq raez he, Bouxcuengh cij miz vah, mbouj miz saw doengjit habfap. Bi 1957 ndwen 11 ngoenz 29, Gozvuyen baecinj 《Fueng’anq Sawcuengh》, caemqhcaiq doengzeiq youq dieg Bouxcuengh doihengz yungh. Bi 1982 ndwen 3, Swcigih Cwngfuj goengbouh 《Fuenganq Sawcuengh (Anqcoih- cingq)》, laebdingh yungh 26 cih Lahdingh Cihmeh hingzsik daeuj geiqloeg caeuq raiz Sawcuengh, hawj 《Fueng’anq Sawcuengh》 youq gwnz giekdaej baujciz ndaej onjdingh miz gienzvi gaen ndaet yamqdin seizdaih baenaj, mboujduenh caeuq seizdaih caez baenaj .

Cinz Vuj cungfaen haengjdingh gij cingzcik daengx gih doicaenh hengzguh 《Fueng’anq Sawcuengh》 aeundaej haenx. De naeuz, seizdaih moq doiq Guengjsae Sawcuengh Vahcuengh saehnieb hwngfat daez- ok iugouz moq, aeu caenh’itbouh gyagiengz gij cwzyinganj caeuq sawj- minghganj guh ndei hong Sawcuengh Vahcuengh, aeu doeksaed gij cing- saenz Cibgouj Daih dangj guh seizndei, doeksaed ndei minzcuz cwngcwz daegbied dwg gij cwngcwz vahsaw minzcuz, genhciz mbouj soeng guh ndei hengzguh 《Fueng’anq Sawcuengh》, mboujduenh doidoengh gij saehnieb vahsaw minzcuz hamj hwnj mbaeklae moq.

（baihlaj cienj 2 banj）