1981 nienz 7 nyied, gou daj Nanzningz Minzcuz Swhfan Yozyau bizyez, seizhaenx, gou gaenq hag Sawcuengh ndaej bi ndeu lo, gou dwg vunz Vujmingz, daj lij iq cungj dwg gangj Vahcuengh, ndigah, roxnyinh Sawcuengh mbouj suenq hoj hag, gou hag ndaej caemh maqhuz ndei, rox doeg di Sawcuengh, youh rox yungh Sawcuengh daeuj sij saek bien faenzcieng dinj, vanzlij ndaej bae son gyoengq lauxsae caeuq ganbu caengz hag Sawcuengh gvaq haenx.

Daj 1985 nienz 10 nyied hwnj, itcig daengz bineix 8 nyied, 32 bi gvaqdaeuj, aenvih hong nyaengq lai gou cungj mbouj ndaejhoengq hag yungh Sawcuengh lo, gij suijbingz doeg sij Sawcuengh gou mbouj ndaej daezsang saekdi. Bineix 8 nyied 17 hauh, dou geij boux doengzhag swhfan bizyez hag Sawcuengh gvaq haenx doxcomz, lij miz vunz ndaej ciengq ok hot go Sawcuengh samcib geij bi gaxgonq hag gvaq haenx, hawj gou gamjdoengh raixcaix, seizgan gvaq ndaej caen vaiq ha, yaepda couh gvaqbae samcib lai bi lo, hoeng, gij Sawcuengh raeuz hag gvaq haenx, cungj lij geiq ndaej cingcuj raixcaix!

Seizhaenx gou couh ngeix: Gij Vahcuengh Gocuengh raeuz baenzlai ndeidingq, gij Sawcuengh raeuz baenzlai ngaih hag, hoeng, seizneix gij vunz gangj Vahcuengh yungh Sawcuengh yied daeuj yied noix, gij vwnzva Bouxcuengh raeuz baenzlawz cij ndaej swnjcienz roengzbae daih dem daih ne?

Gou dawz gij siengjfap caeuq gij youheiq neix lwnh naeuz gyongq doengzhag nyi, boux banhcangj gou couh gangj: “Vazsuij, seizneix mwngz ndaejhoengq le, couh dauqcungz hag Sawcuengh vei, gou ra gij sawson Sawcuengh hawj mwngz, dou cungj saenq mwngz itdingh hag Sawcuengh ndaej engq ndei!”

Gou dingq daengz gij vah neix, angq raixcaix, gangj naeuz: “Docih gyoengqsou lai lo, gou yaek lix daengz laux hag daengz laux, itdingh aeu hag ndei Sawcuengh, vanzlij bangcoh gyoengqvunz gyaez hag Sawcuengh haenx, hag ndei Sawcuengh!”

Gangj daengz guh daengz. 8 nyied 20 hauh, gou sou daengz gij sawson Sawcuengh banhcangj soengq hawj gou haenx, couh hainduj leih- yungh seizhoengq daeuj hag Saw- cuengh, daengz seizneix, gou hag sat le 《Saw Canhgauj Vahcuengh Saw- cuengh Suijbingz Gaujsi 》(cogaep), gag roxnyinh hag ndaej mbouj loek, guh caez gij daez sawqgauj ndaw saw《Saw Canhgauj Vahcuengh Saw- cuengh Suijbingz Gaujsi 》(cogaep) le, doiqciuq dapanq swhgeij bingzfaen, liuh mbouj daengz ndaej gizgwz lo! Seizneix, gou cingqcaih hag 《Saw Canhgauj Vahcuengh Sawcuengh Suijbingz Gaujsi》 (cunggaep), rox- nyinh hix mbouj suenq hoj hag, gou saenq bonjfaenh, itdingh hag ndaej ndei Sawcuengh.