“Va, mwngz caen ak, youh ndaej fatbiuj faenzcieng lobw!”

Dingq daengz doengzsaeh hoz- haenz dwk haenh mbouj dingz, sim gou couh angqvauvau, najrongh raix- caix — Gou dwg Bouxcuengh, daj iq couh caeuq Sawcuengh giet roengz cingzngeih naekna. Dwg Sawcuengh, sawj gou menhmenh majhung hwnj- daeuj.

Gyanghbingz Siujyoz dwg yienh dou aen Cuengh Gun song saw vah sawqniemh siujyoz dandog ndeu. 1988 nienz gou haeujhag doegsaw seiz, couh ndaej caeuq Sawcuengh raen naj lo.“Na、naz、naj、max、gvaq、dah”―gij sing doeg Sawcuengh haenx ciengx- lwenx heuxgeuj youq henz rwz gou, gou caeuq Sawcuengh itheij majhung. Doeg cuhcungh seiz, gou youh gauj hwnj Yienh Minzcuz Cunghyoz ban Sawcuengh. Yienznaeuz mwh haenx dou hag Sawcuengh dwg biengzbeih diemj raemx, hag ndaej feuzfed, hoeng gou cix roxnyinh “gou caeuq Saw- cuengh caen miz yienzfaenh”, hawj gou menhmenh “rox Sawcuengh”.

Bi 1997, gou gauj hwnj Gvangj- sih Sawcuengh Yozyau, ndawsim gou gikdoengh dahraix, gou rox Sawcuengh caeuq gou caiq hix faen mbouj hai lo. Youq hagdangz Sawcuengh, gou nyinhcaen gaen lauxsae daj gyaeuj hag Sawcuengh. Youq gizneix hag Sawcuengh loh cingq, engq biucinj, gou hag ndaej haeujyinx dahraix, caiq hix mbouj lumj gaxgonq hag noix youq lai lo. Gou gaenx doeg hag sij, Sawcuengh suijbingz caemh daezsang haujlai. Duenh neix dwg gou simnet “hag Sawcuengh”.

Bi 2000, gou bizyez le, deng faenboiq bae aen yangh gig gyae ndeu sonsaw, lienzdaemh son geij gaiq bizyez ban yijvwnz, youh guenj aen ban ndeu dem, gou itmienh son, itmienh hag, ngoenznaengz cungj nyaengq- nyetnyet, geij bi gvaqbae, cungj mbouj caeuq Sawcuengh doxraen gvaq.

Cigdaengz bi 2005 ngoenz ndeu, gou fan loengx boek gvih ra bonj saw ndeu, dingjlingz fan ok bonj《Sam Nyied Sam》banj Sawcuengh gaeuqget haenx―sawqmwh, sim gou lumj miz fagmid soemset he cingq camz dawz nei.

“Gou dwg lwg Bouxcuengh, hix hag Sawcuengh gvaq, mbouj ndaej caiq vut Sawcuengh lo, aeu laebdaeb hag yungh roengzbae cijndaej!” Gou roengz dingh gietsim.

Siengj daengz couh guh, gou dawz bit okdaeuj couh hag sij. Yienghneix, bien faenzcieng Saw- cuengh daih’it gou《Daj Seiq Gaiq Dangz Gangj Bihbingz Yisuz》（bi 2006《Sam Nyied Sam》banj Sawcuengh geiz 11）couh daengh okdaeuj lo.

Bi 2006 ndwen 7 ngoenz he, gou sawqmwh sou ndaej fungsaenq Sam Nyied Sam Cazcise geiq daeuj ndeu, gou geizheih dwk mbon saenq okdaeuj yawj― o, laxlawz dwg “cingj” gou bae camgya “Gvangjsih Gaiq Daihsam Sawcuengh Sijcoz Beizyinbanh”, gou angq dwk youh hemq youh diuq, daekeiq fwgfwg. Gou naemj: Aiq dwg faenzcieng gou sij ndaej mbouj ndei, cij deng “cingj” bae hagsib loba. Hoeng, neix hix dwg aen gihvei sawj swhgeij ndaej cinbu ndeu ne!

Baezhaenx bae camgya hagsib, gou soundaej gig lai, mboujdan caen da raen naj doengh boux bouxbien lauxsae Gvangjsih Minzcuz Bause、Sam Nyied Sam Cazcise, lij hag ndaej haujlai gij lizsij vwnzva Bouxcuengh caeuq sijcoz cihsiz dem. Hagsib dauqma, gou engq roengzrengz lienh sij faenzcieng Sawcuengh lo. Ciep- daeuj bien faenzcieng Sawcuengh daihngeih gou《Cij Ca Yamq Din Ndeu》（bi 2007《Sam Nyied Sam》banj Sawcuengh geiz daih 2）youh okseiq lo, gijneix hawj gou engq miz saenqsim riengz diuzroen sij faenz- cieng Sawcuengh ronghsag haenx byaij baenaj.

Bi 2007 ndwen 8, gou caijsoq ndei youh ndaej bae camgya Gaiq Daihseiq Sawcuengh Sijcoz Beiz- yinbanh, baezneix mboujdan hag ndaej engq lai sijsoz fuengfap, vanzlij ndaej roxnaj Yiz Ciz、Cungh Hih- cwngh、Vuengz Gozgvanh 、Lij Veij- meiz doengh boux sij faenzcieng Sawcuengh mizmingz neix, caeuq gyoengqde naj doiq naj doxgyau sijcoz gingniemh, doxcaez gujli, lwgda、lohnaemh engq gvangqlangh lo, sim- angq raixcaix.

Cibngeih bi daeuj, gou mbouj guenj gij hong sonsaw bonjfaenh baenzlawz nyaengq, cungj ce mbouj ndaej Sawcuengh, gaenx sij sanjvwnz caeuq sawcuenh dinj. Laebdaeb youq 《Sam Nyied Sam》caeuq 《Gvangjsih Minzcuz Bau》banj Sawcuengh fatbiuj samcib lai bien faenzcieng. 2014 nienz 12 nyied, bien sawcuenh dinj《Auliengz》bingz ndaej 2014 nienz cozbinj youhsiu “sam daengj ciengj”. 2014 nienz 3 nyied, gou diuh daengz Gyanghbingz Siujyoz le, 11 nyied couh sonyinx hagseng Liengz Siuyingz camgya gaiq daihsam daengx gih siujhagseng gangj gojgaeq Vahcuengh biucinj doxdax ndaej ngeih daengj ciengj, gou hix ndaej bingz hwnj youhsiu cijdauj lauxsae; 2015 nienz 11 nyied, gou youh fucwz fanhoiz caeuq sonyinx siujbinj 《Byawz Dang Gyauhgingj Iq》, bae camgya gaiq daihngeih daengx gih siujhagseng Vahcuengh biucinj caizyi biujyienj doxdax, ndaej it daengj ciengj, gou youh ndaej bingz hwnj youhsiu cijdauj lauxsae. Linghvaih, gou lij camgya 2016 nienz 7 nyied 30 hauh Vahcuengh Sawcuengh Suijbingz Gaujsi (VSSG), ndaej gaugaep gyazdwngj cwngsuh.

Gijneix, couh dwg gij ginggvaq “yungh Sawcuengh ” gou lo.

Sawcuengh sawj gou majhung, de youq ndaw sim gou gaenq rag laeg mbaw mwn, ciengxlwenx buenx youq henz ndang gou.