Ranz gou youq Vanzgyangh Mauznanzcuz Swciyen, gou dwg vunz Bouxcuengh, gangj Vahcuengh maj- hung. Daj gou haeuj hagdangz doeg- saw, couh miz dangzgoq Sawcuengh. Seizhaenx Sawcuengh mbouj ndaej yawjnaek geijlai, gou cij rox doeg geij aen singmeh yinhmeh. Daengz gou hwnj cuhcungh、gauhcungh couh mbouj hwnj dangz Sawcuengh lo, Sawcuengh youq gij yinsieng gou cugciemh mumjgyumq.

Daengz gou gauhcungh bizyez le, daxmeh gou dingq vunz gangj Gvangjsih Swhfan Yozyen miz aen conhyez mienx cienzhag ndeu—Cuengh Gun song saw vah gyauyuz conhyez, doeg aen conhyez neix bizyez le couh dauqma dangdieg dang lauxsae, daxmeh couh caeuq gou gangj naeuz ndaw ranz gungz lai, heuh gou bauq aen conhyez neix. Seizde yienznaeuz gou mbouj cingznyienh, hoeng doeklaeng cix ciuq gij vah daxmeh bae guh, bauqdoeg le aen conhyez neix lo.

Gou raekdaiq faenhsim mbouj nyienh caeuq ngeizvaeg haenx yamq haeuj ranzhag dayoz, hainduj gou cix mbouj yunghsim hagsib, daegbied dwg hag goq Sawcuengh. Caenh nyinh- naeuz Sawcuengh dan dwg vanjhaeux baezlaeng gou, vihliux ndaej swnhleih bizyez, gou hix caenh cij rubrab bae hag.

Riengz seizgan hagsib Saw- cuengh yied daeuj yied nanz, rox le engq lai gij cihsiz gvendaengz Sawcuengh, gou ciemhciemh doiq Sawcuengh miz gij yinxdaeuz ok- daeuj, gou hainduj nyinhcaen hagsib Sawcuengh. Bizyez bi haenx, vihliux roxnyinh swhgeij hag ndaej baenzlawz yiengh, gou couh camgya gaiq haenx Vahcuengh Sawcuengh suijbingz gaujsi, yienznaeuz cij ndaej 70 faen, hoeng ndaw sim gou angqvauvau.

Daengz gou gunghcoz le, gou bienqbaenz boux lauxsae son Cuengh Gun song saw vah, gawq sim’angq youh miznaj. Vihliux daezsang suij- bingz Sawcuengh gou, gou youh gauj hwnj Gvangjsih Minzcuz Dayoz Cung- guek siujsoq minzcuz yijyenz vwnzyoz conhyez, laebdaeb bae hagsib Saw- cuengh.

Seizneix Sawcuengh mboujdan dwg gij sawcih gou baengh de senglix, hix dwg gij yinxdaeuz gij haengjgyaez gou. Seizneix bouxlawz lij doiq gou naeuz, hag Sawcuengh mbouj miz yungh, gou cungj dwg gig yiemzsuk naeuz de nyi: “Dwg vunz Bouxcuengh wnggai rox gangj Vahcuengh、hag rox Sawcuengh、 yungh Sawcuengh, raeuz aeu rox doh gij vwnzva minzcuz swhgeij, ndiepgyaez gij minzcuz vwnzva swhgeij.” Gou gig miznaj swhgeij doeg aen conhyez neix, gig miz caijsoq ndaej hag Sawcuengh, gou maqmuengh gyoengqvunz hag Sawcuengh yied daeuj yied lai, caez swnjcienz gij vwnzva minzcuz raeuz.