Dwen daengz hag Sawcuengh, gij goj gou yaek gangj haenx caemh miz haujlai.

Bi 1987 yawhgauj ngamq gvaq, gou caeuq geij boux doengzhag guhdoih bae cimh lauxsae Sawcuengh hag ciblai ngoenz le, rox doeg singmeh、yinhmeh、singdiuh caeuq gyoepdoeg Sawcuengh, riengzlaeng caeu di seizgan un doeg lienh sij, caemh doeg ndaej raeuzredred, lij ndaej dawz gij vah ndaw sim siengj haenx sij okdaeuj dem. Couh yienghneix, bi de gou swnhleih gauj hwnj Gvangjsih Sawcuengh Yozyau. Bizyez le gou baen baema lajmbanj ranzmbanj aen siujyoz ndeu dang yijvwnz lauxsae, ciuq “aeu Cuengh guhcawj, Cuengh Gun giethab，aeu Cuengh coi Gun，Cuengh Gun cungj rox” cibroek cih fuengcim sonhag neix bae guh, doeklaeng gou son aen ban de yijvwnz cingzcik geizgauj baiz youq ndaw yangh daih’it mingz, ndaej daengz ndaw yangh lingjdauj dajciengj, hawj hagdangz dou ndaej najrongh, gou hix roxnyinh ndaenggon lai lo.

Bi 1993 ndwen 3 gou diuh haeuj Gvangjsih Sawcuengh Yozyau guhhong. Youq gizneix yienz- naeuz mbouj hwnj dangzgoq Sawcuengh lo, danhseih, gou baez ndaejhoengq couh fan yawj saw bauq Sawcuengh. Miz Vahcuengh Sawcuengh suijbingz gaujsi le youh haengjheiq dwk caenhrengz bwh ndei bae gauj, ndaej swnhleih gauj gvaq daengj gaugaep caemhcaiq aeu ndaej bonj cwngsuh dem.

Hawj gou maez haeuj ndaw Sawcuengh bae baenz boux sughangz guh hong Sawcuengh, dwg bi 2011 camgya Gyauyuzdingh cujciz biensij doengh bonj saw《Angq Hag Sawcuengh》cek gwnz, bonj saw neix dwg bonj saw gih raeuz Cuengh Gun song saw vah gyauyuz cijdauj doengh boux lwgnyez yaek haeuj siujyoz guh hozdung yungh. Seizhaenx Gyauyuzdingh cingq gietdingh youq Mbanjcuengh raeuz mbangj yozyau lajmbanj guh loih daihngeih Cuengh Gun song saw vah sonhag sawqniemh, aeu bien gij sawson de, gou miz caijsoq baenz boux biensij caeuq boux saemjcaz ndeu. Gou roxnyinh cwzyin gou naek lai, hix gagrox bae hagsib hawj suijbingz Sawcuengh gou daezswng vaiqdi, gou baez miz gihvei couh cam Cinz Sinhyen fuyaucangj，baez ndaejhoengq couh cam Dwngz Mingzsinh lauxsae, doq hagsib doq bae saedguh, youq ndaw hong daezsang bonjfaenh. Bonj sawson neix ndaej doengh boux conhgyah saeqsim cijdauj caeuq coihgaij le, youq bi 2012 ndwen 8 youz Gvangjsih Minzcuz Cuzbanjse oksaw lo.

Neix suenq dwg gou baez daihdaeuz ndaej aen mingzdaeuz miznaj haeuj hangz. Ciepdwk youq bi 2013 co gou youh camgya “Aen Hoih Saemjcaz Gij Gyaucaiz Lienhguh Cuengh Gun Song Vah Saw” Gvangjsih Minzcuz Gyauyuz Fazcanj Cungsim cujciz haenx. Lumj doengh cungj hoih biensaemj sawson neix, gou hix caiq ndaej bae camgya haujlai baez gvaq. Gou roxnyinh moix baez camgya sat le yezvu gou cungj ndaej daezsang. Youq bi 2013 ndwen 8 gou caeuq gyoengq lauxsae bien bonj saw《Sawcuengh》it nienzgaep cek gwnz haenx ndaej swnhleih oksaw; bi de ndwen 11 youh miz lunvwnz《Genjlwnh Laj Beigingj Cenzgiuzva Gij Cozyung Sawcuengh Suijbingz Daengjgaep Gaujsi》ndaej daengh youq gwnz《Sam Nyied Sam》; bi 2014 gij fwen gou sij haenx《Fwen Haenh Gyacizgvanh》youh ndaej daengh youq gwnz《Sam Nyied Sam》geiz daihroek. Caen dwg saehndei mbouj duenh ha!

Geij bi neix daeuj, gou gonqlaeng camgya le aen ban “Doenghboux Biensij Cuengh Gun Song Vah Saw Gyaucaiz Beizyinbanh” bi 2015 Gyauyuz- dingh banh caeuq aen ban “Gvangjsih Gaiq Daihroek Sawcuengh Sejcoz Beizyinbanh” bi 2015 ndwen 8 Sam Nyied Sam Cazcise banh、aen ban “Daengx Gih Cuengh Gun Song Vah Saw Lauxsae Sawcuengh Beizyinbanh” bi 2017 ndwen 7 Gvangj- sih Minzcuz Dayoz banh daengj doenghgij ban beizyin neix, hawj gou roxnyinh suijbingz Sawcuengh gou ndaej daezsang gig vaiq, yungh ndaej engq sugswd. Geij bi neix gou cawjbien bonj sawson《Sawcuengh》siujyoz seiq nienzgaep cek gwnz caeuq camgya bien sij siujyoz haj nienzgaep cek gwnz daengj doengh bonj sawson neix laebdaeb youz Gvangjsih Minzcuz Cuzbanjse oksaw lo; camgya le guh gij hong loegyaem《Sawcuengh》sam nienzgaep cek gwnz daengj. Gou lij camgya fanhoiz《Ywcuengh Ywmbok Mbokgoek Ywfap Gisuz Cauhcoz Gveihfan Caeuq Ying’yung Yenzgiu》 《Ywcuengh Maeyw Diemj Cit Ywfap Gisuz Cauhcoz Gveihfan Caeuq Ying’yung Yenzgiu》《Yw Diuzdoeng Song Loh》《Yw Diuzdoeng Sam Roen》《Ywcuengh Gij Soujfap Gisuz Gveihfan》 daengj, hix youz Gvangjsih Gohyoz Gisuz Cuzbanjse oksaw lo. Lijmiz, gij faenzcieng Sawcuengh gou sij haenx lumj《Laemzseiz Hwnj Geiq》《Gangj Di Bizyausingq Gvangjsih Saujsu Minzcuz Yijvwnz Laebfap》《Dahbingz》daengj gonqlaeng ndaej daengh youq gwnz《Sam Nyied Sam》(banj Sawcuengh)，hawj gou miznaj dangqmaz.

Sawcuengh, gyo ndaej miz mwngz! Mwngz hawj gou youq seiz mbouj dingz hagsib ndawde ndaej mboujduenh daezsang, hawj gou caeuq mwngz youq doxndiep doxgyaez ndawde roxnyinh daengz saw vah Bouxcuengh raeuz ndeigyaez dangqmaz, hawj gou ngoenz dem ngoenz engq haengj bae liujgaij vwnzva Bouxcuengh! Mwngz hawj gou baenz boux vunz miz siengjmuengh ndeu, youq seiz bae saedyienh siengj- muengh, mwngz youh hawj gou haemq lai haemq lai.