Youq rog aen cinrin miz aen ndoengfaex iq he, youq aen ndoengfaex lingh mbiengj he, miz aen suenva gyaeundei he.

Ndaw suenva hai rim gak cungj va gyaeundei, gij va daengx ngoenz youq ndaw hoengheiq fat ok heiq homfwd, youq ndaw geh va, miz haujlai doenghduz iq youq gizde youq. Banngoenz, gyoengqde youq gwnz diegnywj guh’angq; banhaemh, gyoengqde ninz youq gwnz diegnywj gangjgoj、yawj ndaundeiq, sojmiz gijneix yawj hwnjbae geijlai gyaeundei ha!

Hoeng, miz ngoenz ndeu, gij vunz youq ndaw cinrin youq haenx fatyienh giz dieg ndei neix lo, moix daengz coumued, gyoengqde couh hai ci daiq vunz ndaw ranz daeuj gizneix youz.

“Aen suenva neix caen ndei ha, cijaeu youq gizneix naengh buenq ngoenz, gijmaz nyapnyuk cungj deuz bae liux lo!” Daihgya cungj yiengh- neix gangj.

Daihgya naengh youq diegnywj ndaw suenva, gwn gijgwn ndei gwn, angqvauvau gangjgoj, lwgnyez buet gvaqdaeuj, buet gvaqbae, aenbak angq hemq dwk……

Doenghduz iq youq ndaw suenva youq haenx deng cauz dwk cijndei ndoj haeuj aenranz ndaw cazva giz ceiq laeg bae. Daengz vaiqhaemh, gyoengqvunz youz ndaej habhoz haenx cungjsuenq baema lo.

Baihrog cungjsuenq caemdingh roengzdaeuj lo, gyoengq doenghduz iq siujsim riri byaij ok ranz daeuj.

“Naengmak, gizgiz cungj dwg naengmak, ai! Aen suenva raeuz……” Gyoengq roeglaej youq gwnz diegnywj hemq cici caca.

“W w, lijmiz gyoengqde.” Duz- nou Dazdaz naengh youq bonamh bakranz, yawj gij daeh cang doxgaiq deng rumz ci dwk mbin bae mbin dauq、yiengjsasa haenx simnyap dwk naeuz.

“Danglang!” Aen guenqdiet he youq ndaw rumz ringx ha diuq ha, cingqngamj doek daengz gwnz gyaeuj duzcenh bae.

“Gyoengqde daiq gvaqbouh lo, moix baez cungj dwg yienghneix!” Duzcenh Bwnhbwnh hozndat dwk daengj bwn’oen daengx ndang hwnj.

“Banhaemh raeuz caiq hix mbouj ndaej cwxcaih ninz youq gwnz dieg- nywj yawj ndaundeiq lo.” Cejnuengx duzdouq yawj raemxmak doek youq gwnz diegnywj haenx siengsim dwk naeuz.

“Raeuz yaek siengj aen banhfap ndei ndeu, daeuj fad gij vunz neix cij ndaej.” Gyoengq roeglaej daez naeuz, “mboujnex, gvaq mbouj geij nanz, gizneix couh bienqbaenz dieg nyapnyaj lo!”

“Miz lo,” Dazdaz coengmingz cehda baez cienq, “raeuz ndaej sawj gyoengqde daj gizlawz daeuj, couh ma daengz gizde.”

Aen cawjeiq neix caen ndei ha! Mwngz yawj, ranz duzmoed okdoengh lo! Ranz duzdouq okdoengh lo! Ranz duzcenh okdoengh lo……

Ronghndwen ronghsagsag ciuq youq ndaw suenva, ndaundeiq yaep lwgda yawj dwk daihgya, seizneix, suenva bienq ndaej nauhyied raixcaix, daihgya gamz naengmak, ringx guenq- diet, riuj daehbaucang…… hoengh- hoengh hwdhwd byaij bae coh cinrin.

Ngoenz daihngeih, mwh gij vunz- hung caeuq lwgnyez ndaw cinrin yaek bae hwnjban hwnjhag, ngamq nyoengx douranz okdaeuj, couh caij deng nyapnyaj lo, gyoengqde yaek fatheiq seiz, lwgnyez daraeh haenx naeuz: “A! Gijneix mbouj dwg gij daeh cang saejdaeuz ngoenzlwenz raeuz gwn haenx ha?”

“W w! Lij miz guenqdiet yinjliu gou gwn gvaq haenx.” Daxmeh lwgnyez ganjgip dawz sauqbaet daeuj baet nyapnyaj haeuj doengjnyapnyaj bae.

“Lij miz gyaeujien gou vut haenx.” Daxboh gaeugaeu aen’gyaeuj, aennaj beij gaeqmeh ok gyaeq haenx lij nding.

Gienh saeh neix dauqdaej dwg byawz guh ne?

Yienznaeuz gij vunz ndaw cinrin ndawsim gag guj, hoeng gyoengqde cungj mbouj eiqseiq bae doxcam, gangj daengz daej, luenh vut nyapnyaj mbouj dwg gij saeh miznaj ha! Mboujgvaq, gyoengqde yawj coh ndoengfaex iq bae, sing iq doiq vunz ndaw ranz naeuz: “Baezlaeng raeuz okbae youz, itdingh, itdingh geiq ndaej daiq daeh bae coux nyapnyaj bw!”

(Vangz Fwnjlingz)