Youq ndaw ndoengfaex geq haenx, miz duz guk caeuq duz meuz ndeu youq gizde youq, duzguk rengz loet yungh mbouj rox caenh, hoeng de cawz le rengz loet, di bonjsaeh he hix mbouj miz, gingciengz coemj mbouj dawz doenghduz, ciengzseiz dungx iek. Duzguk gietdingh hag cungj bonjsaeh ndeu.

Ngoenz he, duzguk yawjraen duz meuz ndeu rox saet rox buet, dinfwngz cibfaen riengjret. Yienghneix de giet- dingh baiq duzmeuz guh lauxsae, duzguk goenggoeng gingqgingq doiq duzmeuz naeuz:“Meuz sienseng, gou siengj baiq mwngz guh lauxsae, cingj mwngz son gij bonjsaeh mwngz hawj gou ndaej lwi?” Duzmeuz raen duzguk gouz de, doengzeiq sou de guh lwgsae. Yienghneix duzguk angq raixcaix. Moix ngoenz hwnq caeux haeuj laep riengz saefouh hag bonjsaeh, duzmeuz hix baez bouh baez ciu son de, ginggvaq mboengq seizgan ndeu gaenx hag haenq lienh, gij bonjsaeh duzguk bienq ak haujlai.

Miz ngoenz ndeu, duzmeuz raen duzguk hag ndaej bonjlingx haemq ndei, gietdingh heuh de caeuq saeceij guh ciengz doxbuek ndeu, duzguk yungh gij goengfou henndang saefouh son haenx, hoenx dwk saeceij daengj- ai boemzhoemj, sim’angq raixcaix. Gvaq mboengq he, duzguk gag rox- nyinh gij bonjlingx swhgeij ak lai lo. De naemj：“Caenh’aeu gwngak sae- fouh bae, swhgeij couh dwg lajmbwn daih’it lo.” Baez ndeu swngzgei saefouh mbouj haeujsim, duzguk laeglemx byaij daengz henz ndang duzmeuz, baez yat doxhwnj, aj bak coemj bae, duzmeuz lingzsingj haenx baez yawj mbouj ndei, baenq gyaeuj yut din couh buet, duzguk baez dem baez coemj gvaqbae, mwngz buet gou gyaep, caezgya cungj baegfofo, duzmeuz cadi deng duzguk gaemh dawz, baezneix, duzmeuz lingzsingj neix bin hwnj gwnz go faex hung ndeu. Duzguk doeksaetyat, doq cam:“Saefouh, mwngz baenzlawz mbouj son gou bouh neix ni?” “Mwngz duz mbouj miz liengzsim neix, gou haengjdingh yaek louz miz fwngz ndeu, mboujne ienqhoij mbouj gib!” Duzmeuz oksing hemq naeuz. Duzguk youh gikheiq youh simgip, di banhfap cungj mbouj miz, cij ndaej doeknaiq nueknuek deuz lo.

Dou cienfanh gaej hag duzguk gvaq giuz lumz dwngx, yaekaeu roxdaengz docih hoizbauq boux bang mwngz haenx bw!

(bouxsij：Sam nienzgaep hag- seng Cwnz Yozdwngz Bouxhoiz: Goenggen)