Gvaq geij ngoenz couh daengz ngoenzseng gou lo, daxmeh dapwngq cawx buhvaq hawj gou guh saenzcingz ngoenzseng.

Dauqdaej caj daengz bae cawx buhvaq ngoenz neix lo! Dou bae yawj gij buhvaq daxmeh yawjndei gonq, siengj mbouj daengz song geu vaq cungj mbouj habngamj, geu vunj hix hung lai, hoeng gou gig gyaez cungj vunj baenq hwnjdaeuj byaivunj hunghwdhwd neix, daxmeh cix gangj de youh hung youh mbang, mbouj cawx lo. Gou sikhaek vei ndaej raemxda rimrad, baez yaepda, de couh “dikdaek” roengzdaeuj lo. Dax- meh gangj：“Mbouj gaenj, raeuz aeu cawx gij ceiq ngamj bonjfaenh raeuz cij ndaej ha.” Daxmeh vaiqvet youh yawj hwnj lingh geu vunj, maxsoq miz di iq, hoeng gyaqcienz maqhuz ngamj, daxmeh couh cawx roengzdaeuj lo, gou gig mbouj angq.

Ngoenz daihngeih gou daenj vunj moq bae hag, siengj mbouj daengz ndaejdaengz gyoengqvunz haenh ndei, caez- gya cungj naeuz ndei yawj dangqmaz. Sikhaek gou hix roxnyinh raeujrubrub, yienzlaiz caengz bwnyungz ndawvunj gig dangj ndaej rumz. Gou laeb- daeb daenj le aen singgeiz ndeu cungj sij mbouj ndaej duet bae.

Daxmeh naeuz:“Caj mwngz caiq majhung di, mwngz couh ndaej swhgeij dingh cawx cungj buhvaq lawz, seizneix mwngz lij iq, daxmeh beij mwngz rox yawj.”Gou ngaekngaek gyaeuj, mbouj caiq ngwn lo.

(Cangh Sauhanz sij Ouh Caijfangh hoiz)