Ndwen 10 ngoenz 22, aenhoih fwen hagsib senhconz gij cingsaenz Cibgouj Daih “fwen ciengqyiengj seiz- daih moq” youz Guengjsae Vwnzlenz、Aen Hezvei Vwnzyi’gyah Ndawbiengz Guengjsae cawjbanh haenx youq Namzningz Sinhsiu Gunghyenz banh. Gyoengq canghfwen daj Guengjsae gak dieg daeuj haenx caeuq Namzningz siminz yungh habciengq fwen、doiq fwen daengj fuengsik gejgangj diemj- rongh gij baugau Cibgouj Daih dangj, doenggvaq gij hingzsik youq ndaw guh’angq son neix hagsib senhconz gij cingsaenz Cibgouj Daih.

Gyoengq canghfwen yungh 10 lai cungj diuhfwen lai dieg Guengjsae doenggvaq doiq fwen daengj hingzsik, yungh fu beij hwng soujfap hingzsieng gejgangj gij neiyungz ndei baugau Cibgouj Daih, yiedcingz danqhaenh gij cingzcik ronghsag Cibbet Daih doxdaeuj aeundaej haenx, gangjok gij cingz ceiqheiq lwg Mbanjcuengh mbouj lumz aen simmuengh daeuz, geiqmaenh sijmingh, yien fwngz byaijhaeuj seizdaih moq. Singfwen goksasa yinx ndaej Namzningz siminz gaenxmaenx camgya, foenfoen hwnj- daiz caeuq fwenvuengz doxdax. Danz Vwnzsenj bouxgyaez fwen ban 90 caeuq fwenvuengz doiq fwen le angqyangz naeuz:“Fwen dwg gij vwnzva minzcuz maenhndei raeuz, yungh cungj hingzsik mizyinx sengdoengh neix senhconz gij cingsaenz Cibgouj Daih, ndaej hawj raeuz roxyiuj fwen moq caeuq doiq gij baugau Cibgouj Daih miz roxyiuj engq laeg.”

Baez hoihfwen neix le, gyoengq canghfwen yaek yungh gij hingzsik sawfwen caenh’itbouh senhconz gij baugau Cibgouj Daih dangj, vih gyoengq bouxgyaez fwen gak dieg daengx gih daezhawj bonjsaw fwen hagsib gvancez gij cingsaenz Cibgouj Daih, yungh naengzliengh fwen bang doi Guengjsae gak dieg hengzguh gij cingsaenz Cibgouj Daih.

(Linz Seznaz)