Cozvwnz lauxsae gou dwg Cwnz lauxsae, de mboujdanh sawmaeg lai, vanzlij rox gangjriu, hoeng de miz seiz hix gig yiemzleih.

Miz baez goq cozvwnz he, Cwnz lauxsae cingq gangj goq, cix miz song boux doengzhag youq baihlaj gangjsebseb, Cwnz lauxsae simndei daezsingj songde song baez, hoeng song boux neix cix ciuqyiengh gangj faenhde. Lauxsae nyaenx mbouj ndaej lo, sikhaek bienqnaj, hujfoedfoed sing hung naeuz: “Danghnaeuz song boux sou caiq gangj vah, cingj ok rog bae gangj! Gangj sat caiq haeuj- daeuj.” Seizde, aenda lauxsae daengx dwk luenzlulu, bwnda nyaeuq dwk. Ndaw gyausiz sikhaek bienq ndaej dingh- cubcub, lienz fagcim doek youq gwnz dieg cungj dingq ndaej cingcing cujcuj. Ciep roengz- daeuj, ndaw ban caiq mbouj miz doengzhag gamj gangj vah lo, cij miz gij sing Cwnz lauxsae gangjgoq caeuq sing doengzhag hoizdap vwndiz.

Cwnz lauxsae sonsaw nyinhcaen, sonsaw fuengfap gig ndei. Geiq ndaej baez haenx dwg goq cozvwnz yaek daengz geizmued gaujsi gaxgonq haenx, Cwnz lauxsae baez hwnjdangz, couh naeuz:“Goq neix gig youqgaenj, ndigah cingj daihgya nyinhcaen dingq gangj, mbouj- nex caj sou haenx couh dwg mbwnlaep fwnraq, cix mbouj dwg mbwnrongh mbwn’gvengq.” Cwnz lauxsae ngamq gangj sat, gyoengq doengzhag bouxboux sikhaek naengh ndei naengh cingq. Cwnz lauxsae muenxeiq dwk riuriu le, hainduj hwnj- dangz lo, gyoengq doengzhag bouxboux daengjrwz nyinhcaen dingq lauxsae gangj.

Cwnz lauxsae caenhguenj gig yiemzleih, hoeng gyoengq doengzhag ciuhyiengh gyaez de.

(sam nienzgaep Cau Swjhanz)