武宣县桐岭镇新龙小学五（4）班 韦 莹

Gou siengj danggya gaenq haujlai nanz lo, ngoenzneix daxmeh bae ranzdaiq, de heuh gou ciuqgoq ndei song dahnuengx, daengz banngaiz yaek cawj byaekngaiz hawj dahnuengx gwn. Gou naemj: Daxmeh baeznaengz cawj ngaiz gig yungzheih, gienh saeh neix mbouj nanz ndaej gou.

Yaek daengz banngaiz, gou couh bae ndaw suen mbaet byaek, angq dwk ma daengz ranz cingq siengj cawj byaek seiz, cij siengj daengz gou mbouj rox cawj byaek. Hoeng, gou cien gvaq gyaeqgaeq, gou couh daj ndaw binghsiengh dawz ok haj aen gyaeq, sien swiq rek seuq, caiq hai feiz, yienzhaeuh raix youz roengz rek bae, gou dawz baenz aen baenz aen gyaeq dwk roengz rek bae. Aenvih feiz haenq lai, fan mbouj ndaej gib, cien remj lo. Gou yawj gij gyaeq deng gou cien remj haenx, gamjdaengz gig hojsik. Gou cijndaej bae sanghden cawx geij bau byaekcaqcaiq ma guh byaek gwn lo!

Song dahnuengx gou, boux he cib bi, doeg sam nienzgaep, boux he sam bi buenq, doeg youwzyenz, song dahnuengx neix gig cabheiq, gyaez bae ranzdajcaemx nyamraemx. Gou cawx byaekcaqcaiq ma daengz ranz, mbouj raen gyoengqde youq ndaw ding yawj densi, gou couh byaij haeuj ranzdajcaemx bae, ngamq yaek haeujbae, couh deng gyoengqde aeu raemx faet gou, gou daengx ndang cungj dumz liux lo. Song boux de buh hix dumz liux lo. Gou couh naeuz gyoengqde geij coenz, rag dahnuengx iq bae vuenh buhvaq, vuenh ndei buhvaq le couh heuh gyoengqde gwn ngaiz, dahnuengx hung gwn imq le couh bae yawj densi lo, dahnuengx iq caengz gwn imq, de cij goq loengh gyaq civanzgi de, mbouj gwn ngaiz. Gou cijndei yaeuh de gwn imq bae. Banringz gyoengqde lij yaek ninzringz, gou youh yaeuh dahnuengx iq ninz, hoeng, de baenz lawz hix mbouj ninz, youq gwnz congz diuq bae diuq dauq, youh hemq youh ciengq, aencongz deng de diuq ndaej yaek loemq bae, diuq baeg le couh ing henz congz, yaep he couh ninzndaek lo.

Ngoenzneix cawj gwn、ciuqgoq dahnuengx caen sinhoj ha, gou naemj: Daxmeh bingzseiz ciuqgoq dou geij beixnuengx caen mbouj yungzheih ha! Gaenlaeng gou itdingh dingq daxmeh gangj, mbouj hawj daxmeh yousim、sinhoj, aenvih gou rox le danggya mbouj yungzheih .

(指导老师 覃 瑜)