Ngoenzsinghgiz banngaiz, gou ciep daengz vah mehgux, heuh daxboh bae gaiq naz Yajsanh vat maenz- doengzlingz.

Gwn ngaiz gvaq le, daxboh ra aen daehnaengngwz caeuq faggvak cug gwnz cimohdoz bae, dou song bohlwg couh hwnjdin lo.

Sam nyied rumz cifwdfwd, ci daengz gwnz naj cwxcaih dangqmaz! Mbouj geij nanz dou couh daeujdaengz naz Yajsanh lo, cijraen go maenz- doengzlingz miz mbangj mbaw gaenq roz lo, miz mbangj mbaw lij heu. Daxboh yungh gvak vat, gou couh daenj madfwngz saiq, gou laihnaeuz aen maenzdoengzlingz con ndaw namh bae laeg lai, byawz rox, saiq caengz namh mbang he couh raen maenz- doengzlingz lo. Go maenzdoengzlingz he miz seiq haj aen, gyoengqde hausaksak, baizledled ninz youq geh namh. Maenzdoengzlingz miz hung miz iq, yienghceij mbouj doengz, miz mbangj lumj makhaijdangz luenzlulu, miz mbangj lumj aen gyaeqgaeq nei. Vat le vat gou raen aen maenz- doengzlingz he lumj bouxvunz nei miz gyaeuj、miz da、 miz ndaeng、 miz din、miz fwngz, gou gamjdaengz gig geizheih, couh yaengx hawj daxboh yawj, daxboh raen le riu dwk naeuz:“Aen maenzdoengzlingz neix ceiq giengiengz lo, haengjdingh dwg ndaeknamh hung at gwnz ndang de hawj de doengh mbouj ndaej, hoeng de mbouj fugheiq, ra giz hoengq maj bae, seizgan nanz le, couh baenz yienghceij neix lo.” Daxboh lij gangj:“Maenzdoengzlingz mbouj lumj mak- dauz、maklaeh dawz gij mak ronghsien venj youq gwnz nga sangngau ndei yawj, hawj vunz raen le couh haenh mbouj dingz. Mwngz yawj go maenz- doengzlingz youq gwnz dieg daemq- detdet, caj mbaw henj roxnaeuz roz le, hix mbouj rox de roengz mbouj roengz aen, cijmiz vat hwnjdaeuj cij rox. Daxboh laebdaeb naeuz:“Aen maenz- doengzlingz cawz le miz yingzyangj gyaciz, lij hawj naengnoh bienq ndei: Dawz aen maenzdoengzlingz ronq baenz gep mbang nem youq gwnz naj naj ndaej bienq hau, caemhcaiq lij gemjnoix najnyaeuq dem. Gwn maenz- doengzlingz lij yw ndaej dungxraeng, heuj in、haexgaz、hezyazsang…… Go maenzdoengzlingz couh yienghneix youq lajnamh dinghdingh roengz aen cix mbouj gouz gijmaz.

Dingq gij vah daxboh le, gou naemj: Maenzdoengzlingz mbouj dwg lumj lauxsae dou ma? Lauxsae mbouj gouz mingzleih dawz cihsiz son hawj hagseng, son hagseng guh boux vunz doiq sevei, doiq guekgya miz yungh he. Dang hagseng miz cinbu roxnaeuz doiq guekgya miz yungh seiz, lauxsae cij dwg riunyumj mbouj ok sing mbouj ceng goenglauz, neix mbouj dwg gij cingsaenz maenz- doengzlingz ma?

Gou gyaez gij vunz lumj maenzdoengzlingz vih bouxwnq guh saeh cix mbouj ok saek sing haenx.

(指导老师 覃 瑜)