Daengqnaeuz boux vunzsai,

Aeu maij song boux mbwk,

Gaiq meh ceiq hungmbwk,

Aencingz mbouj dwt sat.

Meh hawj mwngz sengmingh,

Itdingh aeu roxndeq,

Yah buenx mwngz daengz geq,

De ganq lwg ndaej mboeng.

Mwngz okseng mwhde,

Meh in daengz dai dauq,

Seiz hung baenz bouxmbauq,

Aeu hauqgingq daxmeh.

Mizndang youq ndaw dungx,

Rungx geij bi gwnz mbonq,

Mbuk hawq demh mwngz gonq,

Meh fonj ninz giz dumz.

Boux wnq dwg mehyah,

Mbouj dwg ra dahsien,

Dahsau aeu swnzsienh,

Doxaeu goj yienzmuenx.

Naeuz daengxgyoengq bouxsai,

Aeu maij yah cij deng,

Dwg mehyah okrengz,

Caeuq mwngz cengq gyaranz.

Yah caeuq mwngz seng lwg,

Caen dwg mbouj yungzheih,

Mwngz doiq mehyah ndei,

Ranz seizseiz vuenyungz.

Mbouj miz boux mehyah,

Gyaranz caem lumj miuh,

Miz yah daeuj gangjriu,

Ciuhvunz youq cwxcaih.