Baez raen vunz gvej haeux

Gou naemj daeuj youh geiq

Vunz guh naz guh reih

Youh geiq daengz boh gou

Reihnaz cungj aeu cae

Saedcaih dwgrengz lai

Ngoenz muengz ndaej yaek dai

Cag vaiz mbouj ndaej cuengq

Boh gou 70 bi

Lij yunghsim caux gya

Hong reih nem hong naz

Gaenxguh aeu ra ngaenz

Byaekcwx dungxiek ndwnj

Hozhawq gwn raemxheu

Gyoengq rumz hix aeu beuj

De mbouj heuh mbouj gyangz

Gaxgonq dou lij saeq

Saedcaih mbouj ndaej raen

Boh vih lwg ndaej baenz

Aen fwngz muengz daengz byai

Gyanghaet caeux hwnqdaeuj

Mbouj gwn haeux okbae

Daengngoenz doek baihsae

De caengz ndaej doxdauq

Ciengx lwg menh maj hung

Caiq hoj de cungj angq

Langh ndwenngoenz haemzrangq

Hix mbouj gyangz saek gawq

Bouxlaux mbouj yungzheih

Geijcib bi seiqgyaiq

Raemxda doeksaisai

Gaiq hoj boh cimz caez

Seizneix gou majhung

Cungjsuenq ndaej roxsoq

Swnh nienzgeij lij coz

Okrog goq ra cienz