Daxboh gou dwg boux “maez soujgih” he, roengzban ma ranz le, de gawq mbouj guh hongranz hix mbouj buenx gou caeuq dahnuengx guh- caemz, ca mbouj lai sojmiz seizgan cungj yungh daeuj loengh soujgih, mwh youzbyaij yawj soujgih, mwh bae diengzhaex yawj soujgih, gwn haeux hix yawj aen soujgih. Daxmeh mbouj rox gangj geijlai baez lo, de cungj dingq mbouj haeuj rwz.

Miz ngoenz ndeu, gou swnh daxboh mbouj haeujsim, laeglemx dawz aen soujgih de, yo youq ndaw habceij ranzdajcaemx. Gou yaeng- yaeng buet haeuj ranzdajcawj bae, angq dwk dawz gienh saeh neix lwnh hawj daxmeh nyi, daxmeh yaepda coh gou, ngaekngaek gyaeuj, dapwngq bang gou bauj aen mimiz neix. Gig vaiq, daxboh couh raen soujgih mbouj raen lo, gip dwk dauqcawq ra. De sien dwg genjcaz daehbuh daehvaq de baez he, youh buet haeuj ndaw rug bae youq gwnz mbonq sijsij saeqsaeq fan le youh fan, ranzsaw、ranzdajcaemx、yangzdaiz, daxboh aeu gij dieg de siengj ndaej daengz haenx cungj ra baez ndeu, hoeng couh dwg mbouj raen ngaeuz soujgih. Yawj gij yiengh daxboh saetmuengh neix, gou goemq aenbak laeglemx riu.

Daxboh cam daxmeh raen mbouj raen aen soujgih de, daxmeh yawj de mbat he, naeuz:“Mwngz caeuq soujgih dwg doxnem, byawz baenhai ndaej sou ha!” Daxboh dingq ndaej ok gij vah neix dwg gae de, mbouj eiqseiq doiq okbae lo. Gvaq geij miux cung, daxboh bek aen’gyaeuj de mbat he le, dawz aen soujgih daxmeh bued aen haumaj he, gig vaiq sing lingz yiengj lo, daxboh swnh sing yiengj ra bae, doeklaeng raen aen soujgih de lo.

Daxmeh naeuz: “Haengjdingh dwg mwngz itmienh ok haex itmienh yawj soujgih, lumz cuengq gizde lo!” Gangj le lij caengz hozroengz, “Hw, aen soujgih mwngz ceizcaeux miz ngoenz ndeu doek roengz gumzhaex bae.” Daxboh di ndeu hix mbouj hozndat, riunyumnyum coh dou naeuz: “Gou mbouj bae ranzdajcaemx ha. Yawjdaeuj baezlaeng gou yaek siujsim lo, mboujnex soujgih couh maj ‘ga’, gag buetdeuz lo.”

Daj gienh saeh soujgih maj “ga” fatseng le, daxboh gaijbienq haujlai, yawj soujgih seizgan noix lo, hainduj bang daxmeh guh hongranz lo, miz seiz lij buenx gou caeuq dahnuengx guhcaemz dem! Gij bienqvaq daxboh caen hawj vunz angq ha.

(sam nienzgaep Yuz Cinghsuh)