Mbouj miz saek di rumz, mbouj miz saek benq fwj, daengngoenz couh lumj aen lozfeiz hung he, seizbienh cik aen daihdeih. Hoengheiq lumjbaenz gietndangj lo, oemq dwk hawj vunz diemheiq mbouj ndaej. Duzma daengx ndang boemz youq gwnz dieg, gaiqlinx iet ndaej raezrangh. Godoengcing、gofaex bakdou cungj reuqduix lo. Gyoengq roeg bingzseiz gyaez ciengq- go haenx, ndoj bae gizlawz ngaeuz cungj mbouj raen, cijmiz duzbid youq gwnz gyefaex hemq mbouj dingz.

Banringz, mbwn lij dwg ndatfwd- fwd. Mumjgyumq dingqnyi byajraez youq bien mbwn yiengj “gunggung”. Aenda yawj bae, gwnzmbwn baihsae nyoenx hwnj daih benq fwjndaem dahraix. Fwjndaem gig vaiq sanqbanh, gvaq yaep he, couh bu doh daihbuenq mbwn. Aenmbwn laepcupcup, cijmiz baihdoeng lij louz miz diuz sienq rongh he. Raeb fwjndaem, byajmig seiz mbouj seiz mignyag, “gung- lunglung——” sing byajraez engq hung lo. Fwjndaem at roengzdaeuj, sawqmwh, mbwn cungj laep lo, lumj haeuj gyanghwnz nei. Raq rumzhaenq he daj gwnz dieg bongj hwnj, gienj hwnj nanhsa、mbawfaex, duzbid mbouj hemq lo, gij vunz haxbaenh okdaeuj yawj nauhyied haenx, seizneix cungj deng rumz bongj haeuj ranz bae, gwnz gai mbouj miz saek boux vunz.

“Migmyag”, raq byajmig rongh- myan he veh gvaq byonghmbwn, gij sienq rongh de yak lumj nyaujfangz nei, byajraez couh youq gwnz gyaeuj yiengh “gunggung”, lumj yaek dawz dingjranz biengj bae nei. Simndum mbeimanh caengz dingh roengzdaeuj, “va——” fwnhung dauqdaej raix roengzdaeuj lo, ndaw byajmig byaj- raez, fwnhung ronghlik raix roengz gwnz dieg, sawqmwh goenj hwnj raq heiq namh he. Fwnraq cunghuhu, lumj duzmax duet caggieng bae nei, biufafa, cungfodfod. “Bibi baba”, fwn hoenx dingjranz, sinz hwnj fouzsoq gyaeujnaq, raemx dingjranz laefofo, lumj raemxdiuqdat nei. Raemx gwnz dieg gaenq comz baenz dah. Rumz geujlulu, yiengjfitift, swng hwnj baenz raq baenz raq mokraemx. Godoengcing bidoengh aenhwet de, youq ndaw mokraemx riu lo, ndaw diendeih, venj hwnj mbaw muengxraemx hunglot he, caen dwg aen seiqgyaiq raemx ronghsag he.

Sing byajraez bae gyae lo, daengngoenz youq geh fwj seiz haeuj seiz ok, fwn dingz lo, rumz iq cififi, hoengheiq gig singjsien. Gyoengqvunz ok ranz daeuj, vunzhung gangjgangj riuriu, lwgnyez loengh raemx guh- caemz. Mbawfaex doengcing heu- yauyau, duzroeg youq gwnz faex ciengqgo, duzbid youh hainduj angqvauvau hemq “nyetnyet” lo.

(haj nienzgaep Lij Muyenh)