Ranzmbanj gou miz geij goengq bya iq, gwnz bya miz benq diegnywj heusubsub he, henz diegnywj miz diuz dah iq gyaeundei he. Dah iq lumj diuz daihloh gyaeundei he, ndaw dah ciengzciengz youz gvaq geij duz bit iq, lumj gyaqci youq gwnz loh hai gvaq nei.

Dah iq gyanghaet, song henz dah heusubsub. Raq rumz liengz he ci gvaq, gomeg youq ndaw rumz bi gyaeuj diuqfoux. Muengh gvaqbae, lumj langhhaij nei fubfub febfeb, hawj daihdeih bu caengz deihdamj heu he, boiq ndaej diuzdah engqgya gyaeundei.

Banngaiz, daengngoenz ciuq daengx daih- deih, diuzdah youq laj daengngoenz wenjmyag- myag. Seizhaenx, cingqdwg seiz duzbit guh’angq. Bit daxboh caeuq bit daxmeh cingq daiq bang bit iq dwggyaez he daeuj ndaw dah ra gwn. Dou gyoengq lwgnyez dam guhcaemz haenx gwn haeuxngaiz le, daiq gij haeuxbyaek lw daeuj daengz henz dah. Dou gej daeh ok, raix byaek lw haeux lw roengz dah bae, gyoengq bit raen gij gwn le, couh youz gvaqdaeuj ciengj gwnsabsab.

Gyanghaemh, ndaundeiq yaep dwk lwgda, ronghndwen venj youq bien mbwn, hawj dah iq nda hwnj aenmuq saekngaenz, dah iq bienq baenz lungzngaenz lo. Duz lungzngaenz yubyub yabyab heux ndaw geij goengq bya, caeuq aenmbwn laepngau guhcaemz, gou lumj doek haeuj ndaw loq geizheih bae nei.

Diuzdah ranzmbanj, de hawj gou haujlai dauqngeix gyaeundei, de youq ndawsim gou dwg diuz dah ceiq gyaeundei he.

(seiq nienzgaep Cij Haijgiz)