Gou ciengxlwenx mbouj miz banhfap lumz gij vah saenzgeiz lauxsae doiq gou gangj gvaq haenx.

Seizhah miz ngoenz banringz he, gou caeuq doengzhag youq ndaw cauhcangz buet. Mbouj daengz cib faen cung, daihgya couh hanh lae hanh roenx lo. Gou hanh lae’byoeg- byoeg ma daengz gyausiz, ndat ndaej lumj malwg nei iet linx okdaeuj. Lauxsae byaij haeuj gyausiz, yawj gou mbat he, gou hwk dwk suk gaiqlinx haeuj bak bae. Lauxsae cix riuriu, lumjdwg naeuz: “Gij yiengh mwngz caen dwggyaez.”

Hwnjdangz lo, lauxsae youq gwnz gangjdaiz nyinhcaen gangj goq, gou cix youq baihlaj raninz. Lauxsae dingz roengzdaeuj naeuz: “Seizhah ha, duznon raninz ndonj haeuj ndaw ndang vunz bae lo.” Daihgya dingq mbouj rox dwg gijmaz eiqsei, cij miz gou gag rox, lauxsae dwg yungh cungj fuengsik neix daeuj daezsingj gou.

Miz baez ndeu, lauxsae okdaez hawj dou guh, gou daez he hix mbouj rox guh, gou couh ngaezngwd yawj denhvahbanj. Lauxsae gvaqdaeuj yawjyawj denhvahbanj naeuz: “Gwnz denhvahbanj miz gijmaz ne?” Gou sikhaek hoiz gvaq saenz daeuj. Lauxsae yawj daezmoeg gwnz daiz gou, riunyumnyum cam: “Mwngz gyaez gaeb mbungqmbaj lwi?” Gou ngaekngaek gyaeuj. Lauxsae youh cam: “Mwngz gyaez gyaeundei lwi?” Gou youh ngaekngaek gyaeuj. Lauxsae lumhlumh aenhangz naeuz: “Mwngz aeu gij daez neix dangqguh mbungj- mbaj, couh suenq de mbouj gyaeu- ndei, mwngz lai yawj geij baez, couh yawjraen gij gyaeundei baihndaw de, yienzhaeuh ra aen seizgei ndei gaeb dawz de, couh ndaej lo.” Lauxsae gangj sat couh byaij bae. Yienghneix, gou caen aeu daezmoeg dangqguh mbungqmbaj daeuj gaeb, mbatneix gou raen gij daezmoeg neix mbouj lumj gou siengj haenx guh dwgrengz lo. Ngoenz haenx gou gag caeg angq, aenvih daengx ban cijmiz gou ndaejdaengz lauxsae daezdiemj, hix cijmiz gou guh doiq daezmoeg ceiq lai.

Gij vah lauxsae doiq gou gangj haenx, gou daengxciuh nanzlumz.

(haj nienzgaep Lij Beidenh)