Gou dwg byawz? Itcig gvaqdaeuj lienz gou swhgeij cungj gangj mbouj cingcuj.

Youq ndaw hagdangz, gou dwg boux siujhagseng seiq nienzgaep he. Youq ndaw ban, gou mbouj dwg hagseng gig maenhndei, hoeng hix mbouj dwg boux hagseng ca. Aenvih moix baez gaujsi, geij mingz gaxgonq mbouj miz gou, dangyienz geij mingz doeklaeng hix mbouj miz gou.

Gijwnq ne? Neix couh bae cam bouxwnq lo.

Lauxsae yijvwnz naeuz gou cozvwnz sij ndaej haemq ndei, neix wnggai caeuq gou bingzseiz gyaez yawj saw、gyaez sij baen mbouj hai.

Suyoz lauxsae naeuz gou dwg boux lujlaj he, cujyau dwg bingzseiz sij cozyez simco, ciengzciengz sij loek.

Doengzdaiz gou naeuz gou gijmaz cungj ndei, couh dwg daiq aeuhingz lo. Ai, gou cingznyinh, mboujlwnh guh gijmaz saeh, gou cungj gyaez biujyienh swhgeij, cungj nyinhnaeuz swhgeij miz dauhleix.

Youq ndaw ranz, daxgoeng naeuz gou dwg boux ngaiznyed, aenvih gou sij cozyez cungj dwg ngaizngaiz nyednyed, ngaiz daengz doeklaeng cij gipgip muengzmuengz sij sat.

Daxbuz naeuz gou dwg boux ngahgwn, baez yawjraen ndei gwn, couh gwn mbouj dingz.

Yienghneix cungjgez mbat he, gou cij rox laxlawz gou dwg boux vunz hagsib itbuen、gyaez sij cozvwnz、lujlaj、aeuhingz lai、ngaiznyed caeuq ngahgwn he. Ai, yawjdaeuj gou yaek ndeindei gaij gij loengcawq gou bae lo.

(seiq nienzgaep Sung Vwnz- ginh)