Seizgan youq gizlawz? Gou ciengzciengz yienghneix cam swh- geij. Seizgan youq ndaw dujva hai le youh reuq, youq ndaw mbawfaex gwnz faex heu le youh henj, youq ndaw seiqgeiq mboujduenh doxlawh doxvuenh.

Miz ngoenz ndeu vaiqhaemh, gou riuj aen daehsaw ma daengz ranz, naengh youq naj daiz luenh sij geij mbat cozyez, aenda mbouj rox mbouj nyinh cienq daengz aen soujgih youq henz haenx bae. Aen soujgih haenx lumj miz fapswd nei, ngaeu aensim gou bae lo. Aenmbwn rog cueng ciemhciemh deng saekndaem daz ndaej ndaemndat, daengdaiz gwnz daiz rongh lo, bonjcozyez lij ciuqgaeuq baij youq gwnz daiz. Gou bonjlaiz wnggai youq naj daiz sij cozyez haenx, seizneix cix cij goq yawj aen soujgih ronghsag guhcaemz. Aencung gwnz ciengz yiengj dida dida, cimfaen cimmiux mbouj dingz daenqdoengh dieg de, gij seizgan gou couh yienghneix laeglemx byaij bae lo.

Gou itcig guhcaemz daengz aenda saepsat, cij yawj aencung gwnz ciengz mbat he. Gou doeksaetyat, seizgan gingqyienz bae ndaej baenz vaiq! Sam diemj cung couh yienghneix dinghdingh deuz bae lo, vihmaz mbouj miz vunz lwnh gou saek mbat ne? Mbawbiuj najriu gwnz ciengz lumj dwg riu gou, gou ganjvaiq vut aen soujgih fatndat haenx roengz, naengh youq naj daiz sij gij cozyez caeux couh wnggai sij sat haenx.

Daj seizde hwnj, gou gietsim gaijbienq swhgeij. Gou maqmuengh moix faencung cungj cungsaed dohgvaq, yienzhaeuh lumj ndaej hingz nei daekeiq yawj mbawbiuj najriu gwnz ciengz. Mbouj roxnyinh daengz, yienghneix caeuq seizgan doxbeij gaenq baenz bouhfaenh ndaw gwndaenj gou he lo.

Seizgan gvaq ndaej gig vaiq, youq gij seizgan dinjdet bonjfaenh, mwngz siengj guh di gijmaz, mwngz youh ndaej guh di gijmaz ne? Dwg dadaengx dwk yawj de dinghdingh byaij bae, roxnaeuz yungh de daeuj guh gij saeh miz yungh? Seizgan lumj rumz ityiengh, daeuj ndaej vaiq bae ndaej hix vaiq, vaiq daengz mwngz lienz gij riz de cungj ra mbouj raen.

Dujva dinghdingh reuq le youh hai, mbawfaex dinghdingh heu le youh henj, seiqgeiq dingdingh bae le youh dauq. Hoeng seizgan raeuz bae le couh mbouj caiq dauq lo.

(roek nienzgaep Yenz Lingzvei)