Ngoenz singhgizroek he, gou caeuq geij boux doengzdoih bae ndaw bya guhcaemz.

Dou youq ndaw ndoengfaex buet, bouxboux cungj angq dwk riuhaha. Sawqmwh, henz rwz cienz daeuj sing ung ung ung, dou ngiengx gyaeuj yawj, gyoengqdoq he cingq youq gwnz gyaeuj gvaengxgvax, hwk dwk dou ganjvanq haep aenbak, mbouj gamj diemheiq, di ndeu cungj mbouj gamj doengh. Gou yawjraen gwnz gofaex liz gou mbouj gyae haenx, venj miz aen rongzdoq lumj aen haijvanj hung he, wnggai dwg aen rongz gyoengq doq mbin haenx. Dou menhmenh maeuq roengzdaeuj, caj duzdoq dauq ndaw rongz. Yaep he, gyoengqdoq faenfaen haeuj rongz lo. Mwh dou ndwn hwnj yaek byaij, sawqmwh ndaw rongz youh mbin okdaeuj geij duz doq, hwk dwk dou youh maeuq roengz. Gou siengj, danghnaeuz mbouj miz vunz haeujsim, deng ndat baenzlawz guh ha? Yiengh- neix, gou caeuq gyoengqdoih giet- dingh gyongz aen rongzdoq bae.

Gou gag naeuz gou daeuj gyongz aen rongzdoq. Gij doengzdoih wnq miz mbangj ra buhfwn hawj gou daenj, miz mbangj ndenq hawj gou diuz faex raez he, miz mbangj aeu buh bau aen- gyaeuj caeuq aennaj gou, cij loh ok aenda caeuq conghndaeng. Cang ndei le, gyoengqdoih ndoj daengz giz gyae bae. Gou yaengx diuzfaex bae gyongz rongzdoq, mbat he, song mbat, rongzdoq lij caengz doek roengzdaeuj, duzdoq ung sing he cungj mbin okdaeuj lo, beij haxbaenh lij lai. Gou ganjgip boemz youq gwnz dieg. Duzdoq mbin geij gien le, mbouj raen miz gijmaz saeh, youh mbin haeuj rongz bae lo. Hoeng gou caeuq gyoengqdoih deng hwk dwk lau lo, ganjgip sousib doxgaiq buet ok ndoeng daeuj. Youq gwnz loh ma ranz, dou bungqraen boux boh’au he, couh caeuq de gangj gienh saeh rongzdoq neix. Boh’au naeuz:“Ndaw rongzdoq lij miz haujlai lwgdoq, caj lwgdoq majhung le, gyoengqde couh mbin bae lo, aenrongz louz roengzdaeuj lij ndaej hawj vunz yw bingh bw. Gyongz rongzdoq dwg gienh saeh yungyiemj he, danghnaeuz deng duzdoq ndat, couh camj lo.”

Dingq boh’au yienghneix gangj, dou mbouj gamj caiq gyongz rongzdoq lo. (sam nienzgaep Vangz Yajgez)