Ndwen 8 ngoenz 9 hauh, “aen ci cangqheiq” dadawzmueg Gveilinz Si Daihngeih Yinzminz Yihyen daengz Gunghcwngz Yauzcuz Swciyen Sihlingj Cin veiswnghyen, vih boux ngeizlumj baenz dadawzmueg guh genjleh cazyawj, ginggvaq genjcaz yenjgoh、neigoh、hezyaz、hezdangz daengj hanghmoeg. Ngoenzhaenx gungh genjleh cazyawj le 100 lai boux ngeizlumj baenz dadawzmueg daj Sihlingj Cin、 Gyahvei Cin、 Lungzhuj Yangh daeuj haenx, ndaej daengz vunzlai dangdieg haenhndei.

Ciuq cam rox, bouxbingh hab diuzgienh genjleh cazyawj yaek youq bineix ndwen 10 daengz 12, youq Gveilinz Si Daihngeih Yinzminz Yihyen Bwzyen guh soujsuz mbouj aen cienz. “Aen ci cangqheiq” hanghmoeg dwg aen hanghmoeg goeng’ik leih beksingq veiswngh bangfuz guekgya gaep, youz Aen Cungsim Gozci Doxgyau Caeuq Doxgap Guekgya Veiswngh Giswnghveij bangbanh haenx, dwg Gveilinz Si vih beksingq leih beksingq gunghcwngz hanghmoeg ndawde aen ndeu, bi 2010、bi 2014 “aen ci cangqheiq” haeuj Gveilinz, guh soujsuz dauq raenrongh hawj 2450 boux bouxbingh dadawzmueg, hawj gyoengqde yawjraen rongh dauq, bineix dwg “aen ci cangqheiq” baez daihsam haeuj Gveilinz, dajveh yaek vih 1000 boux bouxbingh dadawzmueg gungzhoj guh soujsuz dauq raenrongh mbouj aeu cienz.

(Liengz Veih/梁 辉 Cangh Linz/张 琳)