Lwgda yawj daeuj, seizhah gaenq gvaqbae lo, nyuenz mbawfaex heuswd hix foenfoen reuqroz、loenq doek, biujmingz seizcou gaenq daeuj daengz.

Seizcou cungj yaek daiq haujlai gij gyaeundei seizhah bae, couh lienz gij va duzrwi caeuq duzmbaj gyaez hix mbouj ndaej mienx. Fajfwngz seizcou, sieng vunz fouz ngaeuz, yienghneix, youh miz geijlai boux vunz ngon hwnj geij coenz sei gaeuq, doxlwnh gij cingzganj ciuhgonq danq seizcou.

Mbouj rox ndawda bouxwnq seizcou dwg maz yiengh, swhgeij dauqfanj youq gyanghongh youzbyaij, yaeng’yaeng gip va loenq, ndaw rumz ci gvaq geij raq hom, gyajgyumq miz geij sing danqheiq nyieg, yaepyet, daj ndaw bak bouxwnq couh miz vunz dwen daengz seizcou.

Daekdaeq lumjbaenz gaenq nyaenx mbouj ndaej deihnamh baenz- neix caemdingh, mbwn caengz laep, doq raih okdaeuj swenjngetnget. Mbwn ciemhciemh laep lo, gyoengqde couh ciuz youq giz he ciengqgo.

Seizcou ngamj raeuz siengj hwnj mbangj saehcingz, geq mbaw godongz daj seizcin daengz seizcou, daj gig miz vuedlig daengz reuqroz, seizgan cienj bae cienj dauq, hoeng gij raeuz gaem ndaej maenh haenx, lauheiq cijmiz geij aen yaepyet gauhneix. Siengj daengz mwh ngamq damzyoux, dou ndaej doxbungz, hoeng, cienq ndang couh faensanq, gag boux youq gag giz.

Ndaw naz, vamiuz deng sou liux dan lw gongqganj baij bae baij dauq, lumj boux baenzbingh nei. Bouxvunz youq rog dauqma ranz, daengx naj riunyumj, youh riuj youh aemq ma daengz ranz.

Mboujdan gag raeuz, lij miz gaiqhuq gwnz deihnamh sojmiz, cungj deng seizgan laeglemx gaijbienq caez. Byawz hix mbouj ndaej baujcwng, gvaq 30 bi le, swhgeij lij dwg baenzneix moengjdoengj, maz cungj mbouj rox. Raeuz majhung lo, seizgan rox bae mbouj rox dauq seiz, raeuz mbouj ndaej mbouj nyinh, mbouj ndaej mbouj ciepsouh swhgeij ciemhciemh bienq laux ndaej byaijdin cungj byaij mbouj onj.

Seizcou, danghnaeuz dwg seizciet doenghgo reuqroz he, couh cingj hawj dou dauqcungz lix baez ndeu ba! Dou yaek vih diuzmingh bonjfaenh ra aen lijyouz ndei he, lix ok gij gyaeundei caeuq cwxcaih.

Danghnaeuz seizcou haeuj daengz geizlaeng, vunz couh hainduj siengjniemh moix go nya. Danghnaeuz gyanghaemh caemcingx lo, faenh siengjniemh neix couh rox daiq vunz byaij bae gig gyae, gig gyae……