Dahdauz seng youq Mbanjyauz, maj youq Mbanjyauz.

Mbanjyauz youq gyang bya. Bya dwg byarin, aen langh aen, aen sang gvaq aen. Daj gizgyae yawj bae, gij ranzfaex Mbanjyauz lumj dwg nem youq gyang dat nei. Gizde conq namh bengz gvaq conq gim, bi daengz byai cij ndaem miz haeuxyangz、lwgmaenz、lwgbiek caeuq duhmeuz gij doenghgo neix, caemhcaiq lij dwg ndaem roengz geh rin bae, lij aeu baengh fwn cij miz sou.

Vunz Mbanjyauz bae haw aeu byaij ndoi benz dat, mbwn caengz rongh okdou, mbwn laep cij ma daengz ranz.

Yienznaeuz dwg aen mbanj he, gizsaed cij miz sam ranz vunz. Dahdauz daj iq couh haenh gyoengq- vunz youq mbanj lajbya, aenvih gyoengqde miz naz miz reih, miz haeuxam gwn.

Dahdauz doeg cuhcungh ngeih nienzgaep bihaenx, maj baenz dahsau sangreux gyaeundei he. Seizneix bouxmoiz daeuj ranz, Dahdauz habhoz dwk haq daengz mbanj lajbya, daeuj guh dahsauj gou. Haeuxam gaeuq gwn imq gwn doh, hoeng mbouj miz maz ngaenz sawjyungh. Lwgnyez rim bi le, dahsauj naeuz yaek bae Guengjdoeng dajgoeng.

Daeggo mbouj hawj dahsauj bae, naeuz:“Boux mehmbwk ndeu bae gizgyae, mbouj rox vunz, mbouj rox dieg, mbouj ancienz, mbouj cinj bae.” Hoeng dahsauj mbouj dingqgangj, itdingh aeu bae, laeglemx sousib buhvaq, ngoenz daihngeih mbwn caengz rongh couh okdou. Daeggo gyaep daengz gwnz loh, mbouj raen ngaeuz vunz lo, de hujdengdeng naeuz: “Mwngz bae, mwngz bae! Bae couh mbouj cinj dauq, dauqdaeuj gou dub ga mwngz raek bae.”

Daeggo najlaep dwk maranz, son gou naeuz:“Mwngz gaej hag dahsauj mwngz bw, roengzrengz doegsaw cij miz okloh.” Gou ngaekngaek gyaeuj.

Doeklaeng engq yunghrengz bae doegsaw. Lauxsae ciengzciengz haenh gou, naeuz gou doeg saw maenh caemhcaiq roxsoq. Gou baez dem baez dawz gij ciengjcang dauqdaeuj hawj daeggo yawj, daeggo angq raixcaix.

Gvaq le geij ndwen, dahsauj miz saenq dauq lo, de naeuz geiq 3000 maenz ngaenz dauq, cam daeggo sou ndaej caengz. Daeggo mbwnjbak dwk naeuz:“Byawz citgeiz gij ngaenz mwngz.” Gou yaek hawj dahsauj hoiz saenq, deng daeggo ndaq, naeuz mbouj cinj hoiz.

Baez gek ndwen song ndwen, dahsauj couh geiq baez ngaenz he dauq. Daeggo mbouj ok sing lo. Daeggo lanz mbouj ndaej dahsauj geiq ngaenz dauq, hix lanz mbouj ndaej gij sim ngah swhgeij.

Dahsauj baez daihhaj geiq ngaenz dauq seiz, daeggo lij dwg bak mboenboebboeb, mbouj ok sing, doeklaeng doiq gou naeuz:“Sij saenq hawj dahsauj mwngz, heuh de gaej geiq ngaenz dauq lo, ranz raeuz mbouj hoj ngaenz.”

Seizhaenx vunzmbanj gaenq cienz doh gij vah yak vah rwix, gij vah neix cungj dwg lwnh dahsauj gou, coenz maz cungj miz, hojdingq dangqmaz.

Miz baez ndeu, daeggo fouzeiq dingq daengz gij vah neix le, naj de bienq heuloeg caez, lij nenghraerae. De laebdaeb geij ngoenz cungj mbouj okdou, roxnyinh saetnaj lai. Gij ronghda gyoengq vunzmbanj yawj daeggo, lumj cim nei coeg haeuj naj daeggo bae, hawj de hojsouh fouzbeij.

Daeggo huj dwk naj nding rwz hoq, doiq gou naeuz:“Sij saenq bae heuh dahsauj mwngz dauq ranz, mboujnex couh doxliz!” Hoeng, dah- sauj mbouj dauq.

Gij ngaenz dahsauj geiq dauq, lumj raemxmboq dongj nei dimz hix dimz mbouj ndaej. Seizgan nanz le, daeggo gvenq lo, cingsaenz de bienq ndaej mazmwnh, doeklaeng bienq baenz damzdingz dem.

Ciemhciemh, daeggo byaij okdou bae caeuq vunzmbanj gangjgoj guh riu. Baez bungz vunz couh mizeiq fouzeiq dwk lwnhnaeuz dahsauj gou youq Guengjdoeng aen cangj guh buhvaq ndeu, dang lingxban. Daeggo lij gangjboq naeuz gij ngaenz hong boux lingxban beij boux gunghyinz lai, lij miz ciengjgim lingx dem. Moix baez daeggo gangj gij vah neix seiz, de mbouj swt vunzmbanj gyaez mbouj gyaez dingq roxnaeuz baenzlawz caegriu de.

Youq ndaw mbanj daeggo dwg boux daih’it laeb ndaej ranzlaeuz, cang ndaej gyaeundei dangqmaz, cawx gak cungj gyasei gyadienh bengz. Daeggo lij cawx gyaq mohdozceh ndeu, ndaej hoengq seiz, hai bae haw youz, hai daengz gizlawz, gwnz roen gizde couh faenxfufu.

Aen hwet daeggo menhmenh iet ndaej soh lo, gij yienghceij byaij roen de hix miznaj lai, caemhcaiq najhai raixcaix.

Bi daihsam, daeggo lij cawx aen dohlahgih ndeu dem, gij hong cae reih rauq naz ndaw mbanj caeuq mbanj- nden de bau caez.

Daeggo mbouj swt mbouj langh vunzmbanj baenzlawz hozhaenz、baenzlawz da’nding ranz dou.

Miz ngoenz ndeu, daeggo sing daemq dwk doiq gou naeuz:“Gou naeuz ha, doegsaw lai hix mbouj miz maz yungh, mwngz dwg mbouj dwg bae caeuq dahsauj mwngz caemh guh hong?”